Astanada ótip jatqan halyqaralyq mýltisporttyq «Bolashaq oiyndary – 2026» týrniri kórermen qyzyǵýshylyǵy boiynsha joba tarihyndaǵy eń joǵary kórsetkishke jaqyndap keledi.
Jarystyń alǵashqy tórt kúniniń ózinde transliatsiialar 85 millionnan astam qaralymǵa qol jetkizdi. Qazirgi qarqyn saqtalsa, týrnir aiaqtalǵanǵa deiingi jalpy aýditoriia kólemi 430-490 million qaralymǵa jetýi múmkin.
Mundai nátijege halyqaralyq mediaseriktester jelisiniń aitarlyqtai keńeiýi yqpal etip otyr. Máselen, biyl týrnirdiń mediaseriktesteri sany 27-den 54-ke, al jarysty kórsetetin strimerlerdiń sany 58-den 120-ǵa deiin artty. Sonymen qatar transliatsiialar 16-dan astam tilde júrgizilip jatyr.
Týrnir kontenti Qytai, TMD elderi, Latyn Amerikasy, Úndistan jáne álemniń ózge de óńirlerindegi jetekshi televiziialyq jáne tsifrlyq platformalar arqyly taratylyp jatyr. Negizgi seriktester qatarynda HUYA, BIGG TV, Play TV, XP Esports, VK, bilibili, Rutube jáne Douyu platformalary bar.
Kórermen aýditoriiasynyń artýyna tsifrlyq platformalar da aitarlyqtai yqpal etip otyr. Aldyńǵy týrnirde barlyq qaralymnyń shamamen 82 paiyzy strimingtik servisterge tiesili bolsa, biyl bul kórsetkishtiń odan ári ósip kele jatqany baiqalady. Bul fidjital-formattyń jastar men tehnologiialyq aýditoriia arasynda joǵary suranysqa ie ekenin kórsetedi.
Týrnirdiń eń joǵary kórermen kórsetkishteri aldaǵy finaldyq jarystar kezinde kútilýde. 5 tamyzda Dota 2 týrniriniń finaly ótse, 8-9 tamyzda Counter-Strike 2, Mobile Legends: Bang Bang jáne fidjital-fýtbol jarystarynyń jeńimpazdary anyqtalady. Sarapshylar dál osy básekeler jalpy aýditoriia ósiminiń negizgi draiverine ainalady dep boljap otyr.
«Bolashaq oiyndary – 2026» týrniriniń Astanada uiymdastyrylýy Qazaqstannyń halyqaralyq deńgeidegi sporttyq ári tehnologiialyq is-sharalardy joǵary deńgeide ótkize alatyn el ekenin taǵy bir márte dáleldep otyr. Milliondaǵan sheteldik kórermendi qamtyǵan transliatsiialar Qazaqstannyń halyqaralyq deńgeidegi tanymaldylyǵyn arttyryp, elimizdiń jahandyq fidjital indýstriiasyndaǵy pozitsiiasyn nyǵaitýǵa yqpal etip jatyr.
Eske sala keteiik, «Bolashaq oiyndary» – dástúrli sport pen tsifrlyq tehnologiialardy ushtastyratyn halyqaralyq mýltisporttyq týrnir. Biylǵy jarys 29 shilde men 9 tamyz aralyǵynda Astana qalasynda ótýde.
«Bolashaq oiyndary – 2026»: Astanadaǵy týrnir jahandyq aýditoriia rekordyn jańartýǵa jaqyn
