Qytaida elde turatyn 56 etnostyń birligi men damýyn nyǵaitýǵa baǵyttalǵan jańa zań kúshine endi.
Qujat biyl kóktemde ótken eki sessiia barysynda qabyldanǵan. Zań etnosaralyq máselelerdi quqyqtyq turǵydan retteýge negiz qalyptastyryp, barlyq etnostardyń ortaq biregeilik sezimin nyǵaitýǵa yqpal etedi. Sonymen qatar etnostyq azshylyqtar turatyn óńirlerdiń ekonomikalyq damýyn qoldaýǵa baǵyttalǵan memlekettik saiasattyń negizgi baǵyttaryn aiqyndaidy. Atap aitqanda, infraqurylymdy damytý men ónerkásip ósimin yntalandyrý sharalary qarastyrylǵan.
Sonymen qatar, Sinhýa agenttiginiń habarlaýynsha, Qytai AQSh pen Eýroodaqtyń ulttyq birlik pen damýdy nyǵaitý týraly jańa zańǵa qatysty bildirgen alańdaýshylyǵyn synǵa aldy.
Qytai Syrtqy ister ministrliginiń resmi ókili Go Tsziakýn AQSh pen Eýroodaqty «etnostyq máseleni» qoldan ýshyqtyrýdy jáne Qytaidyń ishki isterine aralasýdy toqtatýǵa shaqyrdy.
Onyń aitýynsha, Qytai – barlyq ulttary teńdik, birlik, ózara kómek jáne kelisim qaǵidattaryna negizdelgen qatynastar ornatqan birtutas kópultty memleket. Onyń pikirinshe, quqyqtyq júieni jetildirý barlyq etnostardyń zańdy quqyqtary men múddelerin senimdi qorǵaýǵa jáne ulttyq birlikti nyǵaitýǵa yqpal etedi.
Sondai-aq Qytai úkimeti etnostyq azshylyqtardyń mádenietin qorǵaýǵa erekshe mán beretinin jáne barlyq ulttardyń óz tilderi men jazýyn paidalaný ári damytý quqyqtaryna zań aiasynda kepildik beretinin málimdedi. Resmi ókildiń aitýynsha, bul baǵyttaǵy Qytai tájiribesi halyqaralyq qaýymdastyqtyń keń qoldaýyna ie.
«Keibir memleketter ideologiialyq kózqarastar men saiasi maqsattardy basshylyqqa alyp, Qytaidyń áleýmettik-ekonomikalyq damý jáne adam quqyqtaryn qorǵaý salasyndaǵy jetistikterin elemeidi. Olar jekelegen derekterdi jalpy konteksten bólip alyp, Qytaidyń ulttyq saiasatyn ádeii qaralaidy, jalǵan aqparat taratady, Qytaidyń ishki isterine óreskel aralasyp, ulttyq birligine nuqsan keltirýge tyrysady. Qytai buǵan úzildi-kesildi qarsy. Biz tiisti memleketterdi naqty faktilerdi qurmetteýge, jalǵan aqparat taratýdy toqtatýǵa jáne ulttyq máselelerdi Qytaidyń ishki isterine aralasý quraly retinde paidalanbaýǵa shaqyramyz», – dedi ol.
Al Anadolu agenttigi maýsym aiynda jariialaǵan maqalasynda Qytai biliginiń málimdemesine súiene otyryp, ulttyq birlik pen damýdy nyǵaitý týraly jańa zań halyqaralyq tájiribege sai keletinin jáne qoǵamdyq kelisimdi nyǵaitýǵa, ulttyq birlikti qorǵaýǵa ári áleýmettik turaqtylyqty qamtamasyz etýge baǵyttalǵanyn habarlady.
Ádilet ministri Hý Veileniń aitýynsha, zań etnosaralyq arazdyq pen separatizmdi qozdyrýǵa baǵyttalǵan áreketter úshin jaýapkershilikti kózdeidi. Sonymen birge ony qoldaný tek zań aiasynda júzege asyrylady jáne halyqaralyq bailanystarǵa, ǵylymi yntymaqtastyqqa, mádeni almasýǵa nemese saýda-ekonomikalyq qatynastarǵa áser etpeidi.
Al Jazeera aqparattyq saity da zańǵa qatysty ótkir baǵa bermei, qujatta jalpyulttyq biregeilikti nyǵaitýǵa, etnostar arasyndaǵy ózara is-qimyldy damytýǵa jáne ulttyq saiasat salasyndaǵy memlekettik jáne qoǵamdyq institýttardyń jumysyn úilestirýge baǵyttalǵan sharalar qarastyrylǵanyn atap ótti.
Beijińniń resmi túsindirýine sáikes, jańa zań ulttyq birlikti nyǵaitýǵa, qoǵamnyń toptasýyn arttyrýǵa jáne eldegi túrli etnostar arasyndaǵy yntymaqtastyqty damytýǵa quqyqtyq negiz qalyptastyrýǵa baǵyttalǵan.
Ózbekstannyń ulttyq aqparat agenttigi Uza bylai dep jazady:
«Álemdegi geosaiasi jaǵdaidyń kúrdelene túsýi jaǵdaiynda ishki turaqtylyq pen ulttyq kelisimdi nyǵaitý árbir memleket úshin strategiialyq mańyzǵa ie bolyp otyr. Ultaralyq kelisim men ózara senim turaqty damýdyń negizgi faktory retinde qarastyrylady».
Osylaisha, jańa zań Qytaidyń etnosaralyq saiasatty damytýǵa qatysty ustanymyn zańnamalyq deńgeide bekitedi. Ony iske asyrý ulttyq birlikti nyǵaitýǵa jáne áleýmettik damýdy qamtamasyz etýge baǵyttalǵan memlekettik strategiianyń mańyzdy tetikteriniń birine ainalmaq bolady.
