Mádeniet jáne aqparat ministri Arman Qyryqbaev Sankt-Peterbýrgte ótken XII Halyqaralyq birikken mádenietter forýmyna qatysty. Forýmǵa sheteldik 43 resmi delegatsiia jinaldy. Sonyń 18-ine mádeniet ministrleri jetekshilik etti, dep habarlaidy ult.kz.
Forým aiasynda Arman Qyryqbaev Resei Federatsiiasynyń Mádeniet ministri Olga Liýbimovamen kezdesti.
Kezdesý basynda Olga Liýbimova Mańǵystaý oblysynda qaza tapqan qazaqstandyq áskeri qyzmetshilerdiń otbasylary men jaqyndaryna kóńil aitty.
Taraptar Qazaqstan men Reseidiń mádeniet salasyndaǵy yntymaqtastyǵyn odan ári damytý jóninde pikir almasty. Atap aitqanda, Qazaqstan Respýblikasy men Resei Federatsiiasy arasyndaǵy mádeni-gýmanitarlyq yntymaqtastyq jónindegi Kishi komissiianyń jumysy men birlesken jobalardy júzege asyrý máselelerine toqtaldy. Kishi komissiianyń besinshi otyrysyn 2027 jyldyń birinshi jartysynda Astanada ótkizý josparlanyp otyr.
Aldaǵy birlesken mádeni jobalar da talqylandy. 8 qazanda Ábilhan Qasteev atyndaǵy Qazaqstan Respýblikasynyń Ulttyq óner mýzeiinde «Nasledie epohi. Iskýsstvo HH veka iz sobraniia Gosýdarstvennoi Tretiakovskoi galerei» kórmesi ashylady. Kórmege 30 týyndy qoiylady. Sondai-aq taraptar Qazaqstan Respýblikasynyń Ulttyq mýzeiinde «Ermitaj kúnderi» jobasyn ótkizý jaiyn qarastyrdy.
Qazaqstan Respýblikasynyń Prezidenti Qasym-Jomart Toqaevtyń tapsyrmasymen Arman Qyryqbaev Olga Liýbimovaǵa II dárejeli «Dostyq» ordenin tabys etti. Olga Liýbimova Qazaqstan men Resei arasyndaǵy dostyq pen yntymaqtastyqty nyǵaitýǵa, sondai-aq eki eldiń mádeni bailanystaryn damytýǵa qosqan eleýli úlesi úshin marapattaldy.
