مەدەنيەت جەنە اقپارات مينيسترٸ ارمان قىرىقباەۆ سانكت-پەتەربۋرگتە ٶتكەن XII حالىقارالىق بٸرٸككەن مەدەنيەتتەر فورۋمىنا قاتىستى. فورۋمعا شەتەلدٸك 43 رەسمي دەلەگاتسييا جينالدى. سونىڭ 18-ٸنە مەدەنيەت مينيسترلەرٸ جەتەكشٸلٸك ەتتٸ, دەپ حابارلايدى ult.kz.
فورۋم اياسىندا ارمان قىرىقباەۆ رەسەي فەدەراتسيياسىنىڭ مەدەنيەت مينيسترٸ ولگا ليۋبيموۆامەن كەزدەستٸ.
كەزدەسۋ باسىندا ولگا ليۋبيموۆا ماڭعىستاۋ وبلىسىندا قازا تاپقان قازاقستاندىق ەسكەري قىزمەتشٸلەردٸڭ وتباسىلارى مەن جاقىندارىنا كٶڭٸل ايتتى.
تاراپتار قازاقستان مەن رەسەيدٸڭ مەدەنيەت سالاسىنداعى ىنتىماقتاستىعىن ودان ەرٸ دامىتۋ جٶنٸندە پٸكٸر الماستى. اتاپ ايتقاندا, قازاقستان رەسپۋبليكاسى مەن رەسەي فەدەراتسيياسى اراسىنداعى مەدەني-گۋمانيتارلىق ىنتىماقتاستىق جٶنٸندەگٸ كٸشٸ كوميسسييانىڭ جۇمىسى مەن بٸرلەسكەن جوبالاردى جٷزەگە اسىرۋ مەسەلەلەرٸنە توقتالدى. كٸشٸ كوميسسييانىڭ بەسٸنشٸ وتىرىسىن 2027 جىلدىڭ بٸرٸنشٸ جارتىسىندا استانادا ٶتكٸزۋ جوسپارلانىپ وتىر.
الداعى بٸرلەسكەن مەدەني جوبالار دا تالقىلاندى. 8 قازاندا ەبٸلحان قاستەەۆ اتىنداعى قازاقستان رەسپۋبليكاسىنىڭ ۇلتتىق ٶنەر مۋزەيٸندە «ناسلەديە ەپوحي. يسكۋسستۆو حح ۆەكا يز سوبرانييا گوسۋدارستۆەننوي ترەتياكوۆسكوي گالەرەي» كٶرمەسٸ اشىلادى. كٶرمەگە 30 تۋىندى قويىلادى. سونداي-اق تاراپتار قازاقستان رەسپۋبليكاسىنىڭ ۇلتتىق مۋزەيٸندە «ەرميتاج كٷندەرٸ» جوباسىن ٶتكٸزۋ جايىن قاراستىردى.
قازاقستان رەسپۋبليكاسىنىڭ پرەزيدەنتٸ قاسىم-جومارت توقاەۆتىڭ تاپسىرماسىمەن ارمان قىرىقباەۆ ولگا ليۋبيموۆاعا II دەرەجەلٸ «دوستىق» وردەنٸن تابىس ەتتٸ. ولگا ليۋبيموۆا قازاقستان مەن رەسەي اراسىنداعى دوستىق پەن ىنتىماقتاستىقتى نىعايتۋعا, سونداي-اق ەكٸ ەلدٸڭ مەدەني بايلانىستارىن دامىتۋعا قوسقان ەلەۋلٸ ٷلەسٸ ٷشٸن ماراپاتتالدى.
