Talǵat Aldybergenov «Qazaqstan temir joly» ulttyq kompaniiasynyń basqarma tóraǵasy qyzmetinen bosatyldy, dep habarlaidy ult.kz.
Mundai sheshimdi kompaniianyń jalǵyz aktsioneri – «Samuryq-Qazyna» ulttyq ál-aýqat qory qabyldady.
Qazirgi tańda qordyń jalǵyz aktsioneri – Qazaqstan Úkimeti.
Talǵat Aldybergenov «Qazaqstan temir joly» UK» AQ basqarma tóraǵasy qyzmetine 2025 jyldyń shilde aiynda taǵaiyndalǵan edi.
Talǵat Aldybergenov kim?
Talǵat Saǵiuly Aldybergenov – Qazaqstannyń temirjol salasynda uzaq jyl eńbek etken basqarýshy ári kólik-logistika salasynyń mamany. Ol ár jyldary temirjol jáne kólik kásiporyndarynda túrli basshylyq qyzmetterdi atqaryp, 2025 jyldyń shildesinde «Qazaqstan temir joly» ulttyq kompaniiasy» AQ basqarma tóraǵasy bolyp taǵaiyndaldy.
Talǵat Aldybergenov 1970 jyly 10 sáýirde Batys Qazaqstan oblysynda dúniege kelgen. Almaty temirjol injenerleri institýtyn «Temirjol kóligindegi tasymaldy uiymdastyrý jáne basqarý» mamandyǵy boiynsha támamdaǵan. Keiin ekonomika salasynda bilimin jetildirip, ekonomika ǵylymdarynyń kandidaty ǵylymi dárejesin aldy.
Eńbek jolyn qarapaiym temirjol qyzmetkeri retinde bastap, júk qabyldaýshy, taýar kassiri, stantsiia kezekshisi sekildi qyzmetterde jumys istegen. Keiin «Qaztransservis», «Kedentransservis», «QazMunaiGaz» júiesindegi kásiporyndarda jáne basqa da kólik-logistika uiymdarynda basshylyq laýazymdardy atqardy. 2024 jyly «Qazaqstan temir joly» ulttyq kompaniiasy basqarma tóraǵasynyń orynbasary bolyp taǵaiyndalsa, araǵa bir jyl salyp kompaniianyń basqarma tóraǵasy qyzmetine kiristi.
Ol QTJ-ny basqarǵan kezeńde temirjol infraqurylymyn jańǵyrtý, júk tasymalynyń tiimdiligin arttyrý jáne halyqaralyq tranzittik baǵyttardy damytý máselelerimen ainalysty. Sonymen qatar jaz mezgilinde poiyzdardyń keshigýine qatysty túsinikteme berip, aptap ystyq kezinde qozǵalys qaýipsizdigin saqtaý úshin poiyzdardyń jyldamdyǵyna ýaqytsha shekteýler engiziletinin málimdegen bolatyn.
