2026 jyldyń birinshi toqsanynyń qorytyndysy boiynsha Qazaqstanǵa 3 mln sheteldik saiahatshy keldi, al shetelge shyqqan Qazaqstan azamattarynyń sany 2,47 mln adamdy qurady (2025 jyldyń qorytyndysy boiynsha Qazaqstanǵa 15,7 mln sheteldik kelgen, bul 2024 jylmen salystyrǵanda 3,1% kóp), dep habarlaidy ult.kz.
Sheteldik qonaqtardyń negizgi aǵynyn dástúrli túrde kórshiles elder qalyptastyrady. Eń kóp kelýshi Ózbekstannan – 1,1 mln adam. Odan keiin Qyrǵyzstan – 723,5 myń adam jáne Resei – 564,7 myń adam.
Sonymen qatar eldiń týristik infraqurylymy da damýyn jalǵastyrýda. 2026 jylǵy 1 sáýirdegi jaǵdai boiynsha Qazaqstanda qonaqúilerdi, demalys bazalaryn jáne basqa da ornalastyrý nysandaryn qosa alǵanda, 4 505 ornalastyrý nysany jumys istedi. Bir jyl ishinde olardyń sany 192-ge artty.
2026 jyldyń qańtar-naýryz ailarynda ornalastyrý oryndarynda 2 mln qonaq toqtady, onyń ishinde 802 myńnan astam adam Qazaqstannyń kýrorttyq aimaqtaryn tańdady.
Eń tanymal kýrorttyq baǵyttar:
- Almaty taý klasteri – 509,3 myń kelýshi;
- Shýchinsko-Býrabai kýrorttyq aimaǵy – 116,7 myń adam;
- Mańǵystaý kýrorttyq aimaǵy – 53,3 myń adam;
- Túrkistan týristik aimaǵy – 39,4 myń adam;
- Altai kýrorttyq aimaǵy – 30,3 myń adam.
2026 jyldyń birinshi toqsanynda ornalastyrý oryndary kórsetken qyzmetterdiń kólemi 69,4 mlrd teńgege jetip, ótken jyldyń sáikes kezeńimen salystyrǵanda 13,9% artty.
Qazaqstanda qonaqúi sektory da damýyn jalǵastyrýda. Búginde elde 23 bes juldyzdy, 45 tórt juldyzdy jáne 26 úsh juldyzdy qonaqúi jumys isteidi.
