Qazaqstanda lombardtar qyzmetinen túsetin tabys rekordtyq deńgeige jetti. Sonymen qatar turǵyndardyń lombardtar aldyndaǵy qaryzy 481,3 mlrd teńgege deiin ósti, dep habarlaidy ult.kz Finprom.kz saityna silteme jasap.
Finprom.kz derekterine sáikes, 2026 jyldyń birinshi toqsanynda eldegi lombardtardyń jiyntyq taza paidasy 54,7 mlrd teńgeni quraǵan. Bul ótken jyldyń osy kezeńimen salystyrǵanda 2,2 ese kóp.
Al 2024 jyldyń basymen salystyrǵanda lombardtardyń tabysy alty eseden astam ósken. Sol kezde sektordyń taza paidasy 8,7 mlrd teńge bolǵan.
Eń kóp tabys tapqan lombardtar
Elde jumys istep turǵan 466 lombardtyń 337-si birinshi toqsandy paidamen aiaqtaǵan.
Eń joǵary tabys tapqan uiymdar:
- «M-Lombard» – 12,9 mlrd teńge;
- «MK-Lombard» – 10,5 mlrd teńge;
- «MK-Zoloto Lombard» – 9,7 mlrd teńge.
Sondai-aq GoldFinMarket pen «Trillioner Lombard» kompaniialarynyń taza paidasy bir jyl ishinde 17 esege deiin artqan.
Al 85 lombard shyǵynǵa ushyraǵan. Eń iri shyǵyn «Lombard €lit Almaty» (134,1 mln teńge) men «Most-lombardta» (120,3 mln teńge) tirkelgen.
Qazaqstandyqtardyń qaryzy kóbeiip jatyr
Sarapshylardyń málimetinshe, 2026 jyldyń naýryz aiynyń sońynda qazaqstandyqtardyń lombardtar aldyndaǵy negizgi bereshegi 481,3 mlrd teńgege jetken.
Bir jyl ishinde lombardtardyń nesie portfeli 63 paiyzǵa ósse, sońǵy eki jylda eki eseden astam ulǵaiǵan.
Merzimi ótken qaryzdar
Soǵan qaramastan, tólem merzimi 90 kúnnen asqan problemalyq qaryzdardyń úlesi jalpy naryqta 2,1 paiyzǵa deiin tómendegen.
Alaida naryq kóleminiń ulǵaiýyna bailanysty merzimi ótken bereshektiń aqshalai kólemi 10,2 mlrd teńgege deiin ósken.
Keibir lombardtarda qaitarylmaǵan nesielerdiń úlesi óte joǵary. Máselen, «Esil-MK Lombard» pen Bravo Lombard-ta merzimi ótken qaryzdardyń úlesi 100 paiyzdy qurasa, «Teh.lombardta» – 90,3 paiyz, al Auto money jelisinde – 32,1 paiyz bolǵan.
Sarapshylar mundai joǵary kórsetkishter kóbine shaǵyn kompaniialarda kezdesetinin, óitkeni birneshe klienttiń qaryzdy qaitarmaýy jalpy statistikaǵa aitarlyqtai áser etetinin atap ótti.
