Qazaqstan turǵyndarynyń infraqurylymǵa qanaǵattaný deńgeii joǵary bolyp otyr. 2026 jyldyń III toqsanynda infraqurylymnyń negizgi elementterine qanaǵattaný kórsetkishi 57,8%-dan 78,2%-ǵa deiin jetken, dep habarlaidy ult.kz.
Bul derekterdi Qazaqstandyq qoǵamdyq damý institýty júrgizgen áleýmettanýlyq zertteý kórsetti. Saýalnama barysynda turǵyndar óz óńirindegi infraqurylym men qyzmetterdiń 17 negizgi elementin baǵalaǵan.
Halyq eń joǵary baǵany áleýmettik mańyzy bar nysandarǵa bergen:
- mektepterdiń qoljetimdiligi – 78,2%;
- balabaqshalardyń qoljetimdiligi – 73,3%;
- sport keshenderi men nysandary – 71,6%;
- mádeniet mekemderi – 71,1%.
Osylaisha, mektepter áleýmettik infraqurylymnyń halyq úshin eń qoljetimdi nysany bolyp qala beredi. Respondentterdiń shamamen 10-nan 8-i óz qalasy, kenti nemese aýylyndaǵy mektepterdiń qoljetimdiligine oń baǵa bergen.
Abattandyrý salasyndaǵy kórsetkishter de salystyrmaly túrde joǵary. Turǵyndardyń 67,8%-y serýendeý jáne demalys oryndarynyń bolýyna, 67,3%-y kógaldandyrýǵa, 63,8%-y kósheler men aýlalardyń tazalyǵyna qanaǵattanatynyn aitqan.
Sonymen qatar balalardy damytý múmkindikteriniń qoljetimdiligine 66,2%, aýyz sý sapasyna 64,4%, memlekettik organdar aqparatynyń qoljetimdiligine 64,6% turǵyn oń baǵa bergen.
Zertteýde joldardyń sapasyna qatysty oń dinamika da baiqalǵan. Bul baǵyt áli de qosymsha nazardy qajet etse de, kórsetkish bir jyl ishinde 50%-dan 57,8%-ǵa deiin ósken.
Zertteý nátijesi áleýmettik mańyzy bar infraqurylymnyń óńirlerdiń negizgi artyqshylyqtarynyń biri bolyp otyrǵanyn kórsetti. Sonymen qatar turǵyndardyń baǵalaýy kólik jáne tsifrlyq infraqurylymdy odan ári damytý qajettigin ańǵartady.
Saýalnamaǵa 18 jastan asqan 2 400 respondent qatysqan. Zertteý Astana, Almaty, Shymkent qalalaryn, 17 oblys ortalyǵyn jáne aýyldyq eldi mekenderdi qamtydy. Saýalnama 2026 jylǵy 1-16 tamyz aralyǵynda jeke suhbat ádisimen júrgizilgen.
