Alýa Nurman, Kumar Túlepuly jáne Ailin Zarqym 2026 jylǵy rapid jáne blits boiynsha komandalyq álem chempionatynan jeke marapattarmen oraldy. Alýa Nurman altyn jáne kúmis medal alsa, Ailin Zarqym — kúmis, Kumar Túlepuly — kúmis pen qola, al Murat Omarov óz taqtalarynda qola júlde jeńip aldy, dep habarlaidy ult.kz.
Jeke marapattar Gonkongta ótken FIDE World Team Rapid and Blitz Championships 2026 týrnirinde qazaqstandyq komandalardyń óner kórsetýiniń mańyzdy qorytyndysy boldy. Jarysta 48 komanda qatysyp, taqtalarda Magnýs Karlsen, Din Lijen, Alireza Firýzdja, Ardjýn Erigaisi, Nodirbek Abdýsattorov jáne basqa da álem juldyzdary oinady.
19 jastaǵy almatylyq Alýa Nurman blitste óz taqtasynda altyn, rapidte kúmis medal jeńip aldy. Ol áýeli Magnýs Karlsenniń komandasyn jeńýge úles qosyp, 12-shi álem chempiony (2008–2010), rapid boiynsha álem chempiony (2021) jáne vitse-chempiony (2012, 2014, 2016) Aleksandra Kosteniýkti jeńdi. Keiin qoldanystaǵy álem chempiony Tsziýi Ventsziýnmen (Dragon Chilling) teń tústi. Odan keiingi eki matchta taǵy jeńiske jetti: ózbekstandyq quramanyń jetekshileriniń biri Gúlruhbegim Toqyrjonovany (Sky Chess) jáne 2025 jylǵy Álem kýbogynyń jeńimpazy, Pretendentter týrniriniń qatysýshysy Divia Deshmuhty (Hexamind Chess Team) jeńdi. Rapid týrnirin Alýa álemniń eń titýldy shahmatshylarynyń biri Harika Dronavallimen (Team MGD1) teń nátijemen aiaqtady. Rapidtegi altyndy Alýa Nurman Indoneziialyq halyqaralyq sheber Naiaka Býdiharmaǵa tek oinaǵan partiialar sanynyń azdyǵy boiynsha utyp qaldy.
Blitste Alýanyń jetistikteri qatarynda 2025 jylǵy Eýropa chempiony Teodora Iniatsti (Theme International Trading) jeńýi jáne 2018 jylǵy blits boiynsha álem chempionatynyń qola júldegeri Lei Tintszemen (Dragon Chilling) 1½–½ esebimen mikromatchta jeńiske jetýi bar.
20 jastaǵy qazaqstandyq áýesqoi shahmatshy Kumar Túlepuly rapidte kúmis, blitste qola medal jeńip aldy. Blitste ony 15 jastaǵy qazaqstandyq shahmatshy Ailin Zarqym basyp ozdy — ol sol taqtada kúmis júldeger atandy.
Kazchess komandasyna shaqyrylǵan sheteldik grossmeister, blits boiynsha úsh dúrkin álem chempiony Aleksandr Grishýk 1-taqtada jeke esepte ekinshi nátije kórsetti.
Hexamind Chess Team quramynda áýesqoi retinde oinaǵan 20 jastaǵy Murat Omarov rapidte qola medal aldy.
Qazaqstan shahmat federatsiiasy jáne onyń bas demeýshisi Freedom Holding Corp. Gonkongta Kazchess jáne Barys eki komandasymen usynyldy.
Kazchess quramynda: Bibisara Asaýbaeva, Qazybek Nógerbek, Aldiiar Ansat, Merýert Kamalidenova jáne áýesqoi Kumar Túlepuly. Sondai-aq komanda úshin sheteldik myqty grossmeisterler oinady: Shahriiar Mamediarov, Aleksandr Grishýk, Rihard Rapport jáne Van Hao. Komanda kapitany — QShF birinshi vitse-prezidenti Darmen Sadvakasov.
Barys quramynda: Dmitrii Andreikin, Piotr Svidler, Denis Mahnev, Ramazan Jalmahanov, Daniial Sapenov, Erǵali Súleimen, Kseniia Balabaeva, Alýa Nurman jáne áýesqoi Ailin Zarqym. Komanda kapitany — QShF atqarýshy direktory Gúlmira Dáýletova.
Rapid boiynsha 2026 jylǵy komandalyq álem chempionatynda Qazaqstan shahmat federatsiiasynyń eki komandasy da top-10-ǵa endi. Kazchess 15 matchtyq upaimen 7-orynǵa, Barys dál sondai upaimen 9-orynǵa turaqtady. Barys komandasynyń eń jarqyn jeńisteriniń biri — Magnýs Karlsenniń WR Chess komandasyn jeńýi boldy. Bul nátije ásirese mańyzdy, óitkeni WR Chess týrnirdiń basty favoritteriniń biri jáne start tizimin bastap turǵan komanda edi.
Rapid aiaqtalǵan soń qatysýshylar blits boiynsha 2026 jylǵy komandalyq álem chempionatyna kóshti. Týrnir 3+2 ýaqyt baqylaýymen (partiiaǵa 3 minýt + ár júriske 2 sekýnd qosymsha) ótti. Komandalar aldymen toptyq kezeńde oinap, sodan keiin 16 úzdik plei-offqa shyqty.
Eki qazaqstandyq komanda da toptyq kezeńnen sátti ótti. Barys A tobynda 18 upaimen 3-oryn alsa, Kazchess D tobynda sol upaimen 2-orynǵa turaqtady.
