Prezident Qasym-Jomart Toqaevtyń tapsyrmasymen elimizde kitap oqý mádenietin damytýǵa jáne oqyrman ult qalyptastyrýǵa baǵyttalǵan jańa jobalar júzege asyryla bastady, dep habarlaidy ult.kz.
Eske salaiyq, 16 mamyrda Memleket basshysy adam kapitalyn damytýǵa, qoǵamnyń ziiatkerlik áleýetin arttyrýǵa jáne bilimdi, básekege qabiletti ult qalyptastyrýǵa arnalǵan «Kitap oqý mádenietin damytý jáne zerdeli ult qalyptastyrý jónindegi sharalar týraly» Jarlyqqa qol qoiǵan bolatyn.
Osy tapsyrmalardy oryndaý maqsatynda Mádeniet jáne aqparat ministrligi kitap oqýdy keńinen nasihattaý, kitaphana isin jańǵyrtý jáne azamattardyń bilimge qoljetimdiligin arttyrýǵa baǵyttalǵan birqatar jobany qolǵa aldy.
Solardyń biri – 2026 jyldyń qyrkúieginde bastalatyn «Jyldyń 10 oqyrmany» respýblikalyq jobasy. Onyń maqsaty – kitap oqýǵa qyzyǵýshylyqty arttyrý, kitapsúier qaýymnyń qataryn kóbeitý jáne qoǵamda oqyrman mádenietin keńinen dáripteý. Joba aiasynda jyl saiyn ártúrli jas sanatyndaǵy eń belsendi oqyrmandar men kitap oqýdy damytýǵa úles qosqan úzdik óńirlik bastamalar anyqtalady.
Sonymen qatar kitap oqý mádenietin damytýǵa erekshe úles qosqan azamattarǵa arnalǵan Ulttyq syilyq taǵaiyndaý josparlanyp otyr. Marapat kitaphanashylarǵa, pedagogterge, jýrnalisterge, jazýshylarǵa, baspagerlerge, qoǵam qairatkerlerine jáne kreativti indýstriia ókilderine beriledi.
Ministrlik kitaphana salasyn tsifrlandyrýǵa da erekshe kóńil bólýde. Memleket basshysynyń tapsyrmasyna sáikes, qazir Ulttyq tsifrlyq kitaphana platformasyn qurý jumystary bastalǵan. Jańa júie elektrondy katalogtardy, tsifrlyq qorlardy, bilim berý resýrstaryn jáne zamanaýi servisterdi bir alańǵa biriktiredi.
Joba iske qosylǵannan keiin elimizdiń kez kelgen turǵyny turǵylyqty jerine qaramastan qazaq jáne álem ádebieti týyndylaryna, ǵylymi eńbekterge, sirek kitaptar men arhiv materialdaryna qol jetkize alady.
Ministrliktiń málimetinshe, sońǵy bes jylda elektrondy kitaptardy paidalaný kórsetkishi 9 millionnan asqan. Sonymen qatar kitaphana infraqurylymyn jańartý jumystary jalǵasýda. 2025 jyly elde úsh jańa kitaphana ashylyp, qala men aýyldardaǵy 36 kitaphana jańǵyrtyldy. Biyl taǵy 30 nysandy jańartý josparlanyp otyr.
