Qazaqstanda shyǵarylatyn kólikter jelisi keńeitilip, avtozaýyttarda jasandy intellekt tehnologiialary belsendi engizile bastaidy. Bul týraly Úkimet otyrysynda ónerkásip jáne qurylys ministri Ersaiyn Naǵaspaev málimdedi, dep habarlaidy ult.kz.
«Memleket basshysynyń tapsyrmasyna sáikes bul óndiristerde jasandy intellekt pen tsifrlyq tehnologiialardy engizý jumystary júrgizilýde. Máselen, qaýipsizdikti jedel basqarýǵa arnalǵan jasandy intellektke negizdelgen ahýaldyq ortalyq iske qosyldy. Intellektýaldy platforma beinekameralardan, datchikterden jáne aqparattyq júielerden kelip túsetin derekterdi taldap, táýekelderdi, tótenshe jaǵdailardy jáne aýytqýlardy jedel anyqtap, olardy ýaqtyly joiýǵa múmkindik beredi», — dep atap ótti ministr.
Onyń aitýynsha, qazirgi ýaqytta elimizde jeńil avtomobilder, avtobýstar, júk jáne arnaiy tehnika shyǵaratyn 11 kásiporyn jumys isteidi. Ótken jyly salada jańa óndiristik qýattar iske qosyldy. Atap aitqanda, jalpy investitsiia kólemi 346 mlrd teńgeden asatyn KIA Qazaqstan jáne Astana Motors Manufacturing Kazakhstan siiaqty eki iri zaýyt ashyldy.
«Salanyń óndiristik áleýetin odan ári arttyrý maqsatynda 2028 jylǵa deiin jeńil jáne kommertsiialyq avtokólik óndirisin keńeitý boiynsha jańa jobalardy júzege asyrý josparlanýda. Sondai-aq Memleket basshysynyń Qytaiǵa sapary aiasynda avtomobil jasaý salasynda birqatar mańyzdy kelisimge qol jetkizildi. Atap aitqanda, Li Auto, OMODA jáne JAECOO markaly avtomobilder óndirisin, SITRAK pilotsyz júk tartqyshtardy shyǵarýdy jáne BYD kompaniiasymen birlesip joǵary jyldamdyqty zariadtaý stansalary jelisin damytý kózdelýde», — dep atap ótti Ersaiyn Naǵaspaev.
