Qazaqstanda tutynýshylardyń quqyqtaryn qorǵaýǵa baǵyttalǵan jańa zań jobasy ázirlenip jatyr. Bul týraly Quryltai depýtaty, tutynýshylardyń quqyqtaryn qorǵaý týraly zań jobasy jónindegi jumys tobynyń jetekshisi Nikita Shatalov málimdedi, dep habarlaidy ult.kz.
Onyń aitýynsha, tek ótken jyldyń ózinde tutynýshylardan 80 myńnan astam shaǵym túsken. Jańa zań jobasy Memleket basshysynyń tapsyrmasy boiynsha ázirlenip jatyr.
Zań jobasynda tutynýshylar úshin birneshe mańyzdy ózgeris qarastyrylǵan.
Birinshiden, taýarlarmen qatar jumystar men qyzmetterge de biryńǵai bazalyq qorǵaý deńgeii engiziledi. Qoldanystaǵy talaptar negizinen taýar satyp alýǵa qatysty bolsa, jańa normalar qyzmet kórsetý salasyna da taralady.
Ekinshiden, tutynýshynyń quqyqtaryn shekteitin kelisimshart talaptary jaramsyz dep tanylady. Iaǵni satýshy nemese qyzmet kórsetýshi jaýapkershilikten aldyn ala bas tartqan jaǵdaida, mundai tarmaqtar ony jaýapkershilikten bosatpaidy. Chektiń joǵalýy da tutynýshynyń quqyǵyn qorǵaýǵa kedergi bolmaýy tiis.
Úshinshiden, tutynýshylardyń quqyqtary jónindegi ombýdsmen institýtyn engizý usynylyp otyr. Ol azamattarǵa keńes berip, júieli máselelerdi memlekettik organdardyń aldyna qoia alady. Sonymen qatar naryqtaǵy erejelerdi ázirleýge qatysyp, qajet bolǵan jaǵdaida tutynýshynyń múddesin sotta qorǵaýǵa múmkindik alady.
Tórtinshiden, eger satýshy nemese qyzmet kórsetýshi máseleni sotqa jetkizbei sheshýge múmkindigi bola tura, isti sotqa deiin jetkizse, oǵan tutynýshynyń paidasyna aiyppul salý qarastyrylǵan.
Nikita Shatalovtyń sózinshe, jańa zańnyń negizgi maqsaty – tutynýshynyń naqty qorǵalýyn qamtamasyz etý jáne adal kásipkerler úshin túsinikti ári ashyq erejeler qalyptastyrý.
Qazir zań jobasy sarapshylarmen, biznes ókilderimen jáne tutynýshylardyń quqyqtaryn qorǵaý uiymdarymen birlesip talqylanyp jatyr.
