Qazaqstanda meditsinalyq bilim berý júiesine birqatar mańyzdy ózgeris engiziledi. Bul týraly Densaýlyq saqtaý ministri Aqmaral Álnazarova Qaraǵandy meditsina ýniversitetinde ótken keńeste málimdedi, dep habarlaidy ult.kz.
Ministrdiń aitýynsha, zańnamalyq ózgerister aiasynda bolashaq dárigerlerdi daiarlaý júiesi praktikalyq densaýlyq saqtaý salasynyń naqty suranysyna beiimdeledi. Soǵan sáikes internatýra merzimi uzartylady, dáriger-internniń resmi mártebesi engiziledi jáne olardyń praktikalyq qyzmetke qatysý múmkindigi keńeitiledi. Sondai-aq rezident-dárigerlerdi daiarlaý júiesi de jetildiriledi.
Endi meditsinalyq joǵary oqý oryndarynda bilim berý baǵdarlamalarynyń praktikalyq bóligi kúsheitiledi. Bolashaq dárigerler tek statsionarda ǵana emes, alǵashqy meditsinalyq-sanitariialyq kómek kórsetý deńgeiinde de jumys isteýge daiyndalady. Bul túlekterdiń naqty eńbek jaǵdaiyna tez beiimdelýine jáne kásibi daǵdylaryn erte qalyptastyrýǵa múmkindik beredi.
Aqmaral Álnazarova Qaraǵandyda salynatyn jańa perinataldyq ortalyq pen 300 oryndyq ýniversitettik klinika meditsinalyq kadrlardy daiarlaýdyń mańyzdy bazasyna ainalatynyn atap ótti.
Sonymen qatar ministr ýniversitette jasandy intellekt negizindegi meditsinalyq jobalarmen tanysty. Atap aitqanda, meditsinalyq qujattardy avtomatty túrde júrgizýge arnalǵan AI Med Voice júiesi tanystyryldy. Ministr jasandy intellektini engizý densaýlyq saqtaý men meditsinalyq bilim berýdi tsifrlandyrýdyń negizgi baǵyttarynyń biri bolýy tiis ekenin aitty.
Densaýlyq saqtaý ministrliginiń málimetinshe, meditsinalyq bilim berý reformasynyń basty maqsaty – qazirgi zaman talaptaryna sai jumys istei alatyn jáne halyqqa kórsetiletin meditsinalyq kómektiń sapasy men qaýipsizdigin qamtamasyz etetin básekege qabiletti mamandar daiarlaý.
