30 shildede atalyp ótetin Dúniejúzilik adam saýdasyna qarsy kúres kúni qarsańynda Ishki ister ministrligi adam saýdasyna qarsy kúres nátijelerin jariialady, dep habarlaidy ult.kz.
Ortalyq kommýnikatsiialar qyzmetinde ótken dóńgelek ústelde QR IIM Uiymdasqan qylmysqa qarsy kúres departamentiniń Úshinshi basqarmasynyń bastyǵy Samat Qusetovtiń aitýynsha, jyl basynan beri politsiia adam saýdasyna qatysty 80-nen astam qylmysty anyqtap, eki uiymdasqan qylmystyq toptyń zańsyz qyzmetin toqtatqan.
Onyń sózinshe, Qazaqstannyń Qylmystyq kodeksinde májbúrli eńbekke tartý, seksýaldyq qanaý, qaiyr suraýǵa májbúrleý siiaqty adam saýdasynyń barlyq túrleri úshin qylmystyq jaýapkershilik qarastyrylǵan. Osyndai quqyq buzýshylyqtardyń aldyn alý jáne jolyn kesý úshin jedel-izdestirý jáne profilaktikalyq is-sharalar turaqty júrgizilip keledi.
Sonymen qatar IIM málimetinshe, Qazaqstan aýmaǵynda azamattardy internet-alaiaqtyq jasaýǵa májbúrleý faktileri tirkelmegen. Alaida shetelde qazaqstandyqtardy osyndai qylmystarǵa arbap tartý jaǵdailary kezdesken.
Budan bólek, jezókshelikpen ainalysý úshin úi-jai berý jáne jynystyq sipattaǵy ózge de qyzmetter kórsetý derekteriniń jolyn kesý jumystary jalǵasýda. Osy baǵytta 700-den astam ákimshilik is tirkelip, quqyq buzýshylarǵa jalpy somasy 213 mln teńgeden astam aiyppul salynǵan.
