Astanada Premer-ministr Oljas Bektenov amerikalyq Firebird kompaniiasynyń negizin qalaýshylary Razmik Ovakimian jáne Aleksandr Esaianmen, sondai-aq NVIDIA vitse-prezidenti Rev Lebaredianmen kezdesti, dep habarlaidy ult.kz.
Kezdesýde Qazaqstandaǵy ulttyq jasandy intellekt infraqurylymyn damytý, joǵary ónimdi esepteý qýattaryn qurý jáne zamanaýi derekterdi óńdeý ortalyqtaryn salý máseleleri talqylandy.
Úkimet Ekibastuzda júzege asyrylyp jatqan «Derekterdi óńdeý ortalyqtary alqaby» jobasyn eldiń tsifrlyq transformatsiiasyndaǵy negizgi bastamalardyń biri retinde qarastyrady. Joba aiasynda qazirgi 300 MVt qýatty kezeń-kezeńimen 1 GVt-qa deiin ulǵaitý josparlanǵan.
Premer-ministr Oljas Bektenov Memleket basshysynyń tapsyrmasymen 2026 jyl Tsifrlandyrý jáne jasandy intellekt jyly bolyp jariialanǵanyn atap ótip, halyqaralyq seriktestermen jasalǵan kelisimderdiń strategiialyq mańyzyn aitty.
Jasandy intellekt jáne tsifrlyq damý ministri Jaslan Mádievtiń aitýynsha, joba aiasynda NVIDIA-nyń sońǵy býyndaǵy 100 myń GPU chipine negizdelgen iri esepteý klasteri qurylady. Jalpy investitsiia kólemi $10 mlrd-ty quraidy. Onyń nátijesinde Qazaqstan jyl saiyn keminde $3 mlrd eksporttyq tabys taýyp, jańa jumys oryndaryn ashýǵa múmkindik alady.
Kezdesý qorytyndysynda Qazaqstannyń Jasandy intellekt jáne tsifrlyq damý ministrligi men Firebird arasynda strategiialyq yntymaqtastyq týraly kelisimge, sondai-aq «KT-TELEKOM» men Firebird arasynda «DÓO alqaby» jobasyn iske asyrý jónindegi kelisimge qol qoiyldy.
Joba jasandy intellekt, bultty tehnologiialar jáne jańa býyn tsifrlyq servisterdi damytýǵa arnalǵan zamanaýi infraqurylym qalyptastyryp, Qazaqstannyń Ortalyq Eýraziiadaǵy iri tsifrlyq hab retindegi pozitsiiasyn nyǵaitýdy kózdeidi.
