Qazaqstan jańa týǵan nárestelerge meditsinalyq kómek kórsetý sapasy boiynsha Ortalyq Aziia elderi arasynda jetekshi orynǵa shyqty. Bul týraly Dúniejúzilik bank, Dúniejúzilik densaýlyq saqtaý uiymy (DDU), IýNISEF, BUU jáne IGME-niń birlesken esebinde aitylǵan, dep habarlaidy ult.kz.
2025 jyldyń qorytyndysy boiynsha elimizde neonataldyq ólim-jitim deńgeii (náresteniń ómiriniń alǵashqy 28 kúnindegi ólimi) 1000 tiri týǵan sábige shaqqanda 3,04 boldy. Bul – Ortalyq Aziiadaǵy eń tómen kórsetkishterdiń biri jáne AQSh deńgeiimen shamalas.
Densaýlyq saqtaý ministrliginiń málimetinshe, qazaqstandyq neonatologtar men reanimatologtar salmaǵy nebári 500 gramm bolyp týǵan nárestelerdi de aman alyp qalý úshin joǵary tehnologiialyq meditsinalyq kómek kórsetedi. Zamanaýi perinataldyq tehnologiialar men dárigerlerdiń kásibi biliktiliginiń arqasynda sońǵy jyldary mundai sábilerdiń ómir súrý kórsetkishi tórt esege artqan.
Jańa týǵan nárestelerdiń qarqyndy terapiia bólimshelerinde jumys isteitin bir meiirger bir aýysymda sábidiń ómirin saqtaý úshin 20-ǵa deiin dál meditsinalyq manipýliatsiia oryndaidy. Arnaiy meditsinalyq jabdyqtar men mamandar náresteniń árbir tynysyn úzdiksiz baqylap otyrady.
Ótken jyly Qazaqstanda 17 myńǵa jýyq shala týǵan sábi dúniege kelgen. Olardyń barlyǵy joǵary tehnologiialyq meditsinalyq kómektiń tolyq keshenin alǵan.
Densaýlyq saqtaý ministrligi bul nátijeler ana men bala densaýlyǵyn qorǵaý júiesin turaqty damytý, zamanaýi meditsinalyq tehnologiialardy engizý jáne meditsina qyzmetkerleriniń kásibi eńbeginiń jemisi ekenin atap ótti.
