Qazaqstanda jolaýshylar poiyzdaryn spýtniktik internetpen jabdyqtaý jumystary jalǵasyp jatyr. Qazirdiń ózinde 31 baǵyttaǵy 59 poiyz quramynyń 770-ten astam vagonynda Starlink interneti qoljetimdi, dep habarlaidy ult.kz.
Joba tsifrlyq infraqurylymdy damytý jáne jolaýshylar tasymalynyń sapasyn arttyrý maqsatynda júzege asyrylyp otyr.
Jospar boiynsha qyrkúiek aiynyń sońyna deiin 50 baǵyttaǵy 124 poiyz quramyn, iaǵni 1 235 vagondy spýtniktik internetpen qamtý kózdelgen.
Spýtniktik internetti poiyzdarda synaqtan ótkizý jumystary 2025 jyly bastalǵan. Alǵashqy jobalar Astana – Almaty, Astana – Óskemen, Astana – Býrabai, Astana – Semei jáne Almaty – Mańǵyshlaq baǵyttarynda júzege asyryldy. 2026 jyly joba keń kólemde engizile bastady.
Qazir internet Nurly jol – Almaty, Nurly jol – Óskemen, Nurly jol – Oral, Nurly jol – Petropavl, Almaty-2 – Óskemen, Qyzylorda – Semei, Aqtóbe – Almaty-1, Mańǵystaý – Aqtóbe, Oral – Mańǵystaý, Aqtóbe – Qazaly, Aqtóbe – Atyraý jáne Pavlodar – Almaty baǵyttarynda qoljetimdi.
Spýtniktik bailanys arqyly internet jyldamdyǵy sekýndyna 100 Mbitke deiin jetedi. Tómen orbitaly spýtnikterdiń kómegimen dástúrli bailanys jelileri nashar qamtityn temirjoldyń shalǵai ýchaskelerinde de internetke qosylýǵa múmkindik bar.
Jolaýshylarǵa internettiń bazalyq tegin paketi usynylady. Onyń aiasynda WhatsApp pen Telegram arqyly mátindik habarlamalar jiberýge qosymsha aqy alynbaidy. Al internetti tolyqqandy paidalanǵysy keletin jolaýshylarǵa qosymsha tariftik paketter usynylady.
Joba poiyzdarda jumys isteý, onlain oqý, jaqyndarmen bailanysta bolý, sondai-aq memlekettik jáne banktik qyzmetterdi paidalaný múmkindigin keńeitedi.
Sonymen qatar spýtniktik internetti engizý bolashaqta poiyzdarda mýltimediialyq jáne basqa da tsifrlyq servisterdi damytýǵa múmkindik beretin tehnologiialyq negiz qalyptastyrmaq.
