Qazaqstan men Pákistan meditsinalyq bilim berý salasyndaǵy yntymaqtastyqty keńeitýge kelisti. Qazaqstan Respýblikasy Densaýlyq saqtaý ministrliginiń qoldaýymen Astana meditsina ýniversiteti men Pákistannyń Bilim berýdi maqsatty qarjylandyrý qory (PAK-EEF) ózara túsinistik týraly memorandýmǵa qol qoidy, dep habarlaidy ult.kz.
Qujat bolashaq dárigerler men meiirgerlerdi halyqaralyq standarttarǵa sai daiarlaýǵa, akademiialyq almasýdy damytýǵa, birlesken ǵylymi zertteýler júrgizýge jáne meditsina salasyndaǵy tájiribe almasýdy kúsheitýge baǵyttalǵan.
Yntymaqtastyqtyń jańa múmkindikteri Qazaqstan Respýblikasynyń Densaýlyq saqtaý ministri Aqmaral Álnazarovanyń Pákistan Islam Respýblikasy Federaldyq bilim berý jáne kásiptik daiarlaý jónindegi memlekettik ministri Vadjiha Kamarmen kezdesýi barysynda talqylandy.
Aqmaral Álnazarova halyqaralyq seriktestik jańa býyn meditsina mamandaryn daiarlaýdyń mańyzdy tetigi ekenin atap ótti. Onyń aitýynsha, qazaqstandyq meditsinalyq joǵary oqý oryndary búginde álemdik bilim berý keńistigine belsendi kirigip, jetekshi sheteldik ýniversitettermen birlesken jobalardy júzege asyryp keledi.
Kezdesý barysynda Qazaqstan Prezidenti Qasym-Jomart Toqaevtyń Pákistannyń PAK-EEF qoryna gýmanitarlyq grant bólý týraly sheshimi eki el arasyndaǵy strategiialyq áriptestikti nyǵaitqan mańyzdy qadam retinde baǵalandy. Bul bastama bilim berý, ǵylym jáne densaýlyq saqtaý salalaryndaǵy ózara bailanysty odan ári damytýǵa jol ashty.
Qazirgi ýaqytta Astana meditsina ýniversiteti Pákistannyń jetekshi meditsinalyq ýniversitetteri men klinikalarymen yntymaqtastyq ornatqan. Jańa memorandým osy seriktestikti jańa deńgeige kóterip, dárigerler men meiirgerlerdi daiarlaý baǵdarlamalaryn jetildirýge, stýdentter men oqytýshylardyń akademiialyq utqyrlyǵyn arttyrýǵa, ǵylymi jobalardy birlesip iske asyrýǵa jáne mamandardyń biliktiligin kóterýge múmkindik beredi.
Ministrdiń aitýynsha, Astana meditsina ýniversitetiniń zamanaýi oqý jáne klinikalyq bazasy, tájiribeli professor-oqytýshylar quramy men halyqaralyq jobalardy júzege asyrý tájiribesi álemdik deńgeidegi meditsina mamandaryn daiarlaýǵa tolyq múmkindik beredi.
