Qazaqstan Respýblikasynyń Syrtqy ister ministrligi Qara teńiz akvatoriiasynda Kaspii qubyry konsortsiýmy (KQK) infraqurylymy arqyly munai tasymaldaýǵa qatysqan azamattyq kemelerge 17 jáne 19 shildede jasalǵan ushqyshsyz ushý apparattarynyń shabýyldaryn qatań aiyptady, dep habarlaidy ult.kz.
SIM málimdeýinshe, bul shabýyldar Qazaqstannyń ekonomikalyq múddelerine jol berýge bolmaityn qol suǵýshylyq bolyp sanalady. Sondai-aq olar zańdy halyqaralyq saýdany, jahandyq energetikalyq naryqtardy jáne halyqaralyq kólik-logistikalyq jetkizý tizbekteriniń qaýipsizdigin turaqsyzdandyrýǵa baǵyttalǵan qasaqana áreket retinde baǵalanǵan.
Ministrlik buǵan deiin barlyq múddeli taraptar kelisken, Qara teńizge KQK terminaldaryna munai tieý úshin kiretin azamattyq kemeler týraly aqparat almasý tetiginiń ádeii eskerilmegenine erekshe alańdaýshylyq bildirdi. Vedomstvonyń málimetinshe, bul azamattyq kemeler ekipajdarynyń ómiri men qaýipsizdigine qaýip tóndirgen.
Osyǵan bailanysty Qazaqstan shabýyldardy dereý toqtatýdy jáne qazaqstandyq kómirsýtek shikizatyn eksporttaý infraqurylymynyń qaýipsizdigin qamtamasyz etý úshin jan-jaqty sharalar qabyldaýdy talap etti.
Sonymen qatar, Qazaqstan seriktes memleketterdi atalǵan shabýyldardy batyl aiyptaýǵa shaqyryp, barlyq múddeli taraptardy osyndai oqiǵalardyń aldyn alýǵa baǵyttalǵan naqty is-sharalardy birlesip ázirleýge úndedi.
Qazirgi ýaqytta Qazaqstan keltirilgen zalalǵa jan-jaqty baǵalaý júrgizip jatyr. Onyń nátijesi boiynsha respýblika halyqaralyq quqyqta kózdelgen barlyq tetikterdi, sonyń ishinde keltirilgen shyǵyndy óteý týraly talap qoiý quqyǵyn paidalaný múmkindigin qarastyrady.
Syrtqy ister ministrligi Qazaqstan qaqtyǵystardy beibit jolmen retteýdi qoldaitynyn, halyqaralyq quqyq qaǵidattaryn, keme qatynasy erkindigin jáne halyqaralyq kólik-logistikalyq ári energetikalyq baǵyttardyń turaqty jumysyn qamtamasyz etý ustanymyna adal ekenin atap ótti.
