Elordada Týrizm jáne sport ministri Erbol Myrzabosynovtyń tóraǵalyǵymen Qazaqstan ulttyq quramasynyń XX jazǵy Aziia oiyndaryna daiyndyǵyna arnalǵan keńes ótti. Jiynǵa sport federatsiialary men óńirlik basqarmalardyń ókilderi qatysty, dep habarlaidy Ult.kz.
XX jazǵy Aziia oiyndary 2026 jylǵy 19 qyrkúiek pen 4 qazan aralyǵynda Japoniianyń Aiti prefektýrasy men Nagoia qalasynda ótedi. Bairaqty dodaǵa Aziianyń 45 elinen 15 myńǵa jýyq sportshy qatysady dep kútilýde. Jarysta sporttyń 469 túrinen medaldar sarapqa salynady.
Qazaqstan quramasy 35 sport túrinen synǵa túsýdi josparlap otyr. Qazirgi tańda ulttyq quramanyń aldyn ala tizimine 571 sportshy engizilgen. Bul Hanchjoýda ótken aldyńǵy Aziia oiyndaryndaǵy kórsetkishten joǵary. Ol kezde Qazaqstan namysyn 523 sportshy qorǵaǵan.
Ulttyq quramany jasaqtaý kezinde sportshylardyń halyqaralyq jarystardaǵy nátijeleri eskeriledi.
Ministrlik Qazaqstan quramasynyń aldyna naqty medal josparyn qoidy. Oǵan sáikes, otandyq sportshylar 99 medal jeńip alýdy kózdep otyr. Bul mindetti oryndaý sport federatsiialaryna júktelgen.
Aziia oiyndaryna daiyndyq aiasynda sportshylardyń oqý-jattyǵý protsesi uiymdastyrylyp, meditsinalyq jáne psihologiialyq qoldaý, tamaqtaný, sporttyq qural-jabdyqtarmen qamtamasyz etý jáne jattyqtyrýshylar quramyn kúsheitý máseleleri qarastyrylǵan.
Daiyndyqty kúsheitý úshin 11 elden sporttyń 13 túri boiynsha 24 sheteldik jattyqtyrýshy-keńesshi tartyldy.
Jyl basynan beri ulttyq quramalar 226 oqý-jattyǵý jiynyn ótkizip, 282 halyqaralyq jarysqa qatysty. Onyń ishinde 26 álem chempionaty, 71 Álem kýbogi kezeńi, 37 Aziia chempionaty jáne sporttyń 68 túrinen 148 halyqaralyq týrnir bar.
Aziia oiyndaryna deiin qazaqstandyq sportshylar taǵy 31 halyqaralyq jarysqa jáne 73 oqý-jattyǵý jiynyna qatysady.
Nagoiada ótetin Aziia oiyndary Qazaqstan úshin 2026 jylǵy basty sporttyq dodalardyń biri bolmaq. Ulttyq quramanyń daiyndyǵy sportshylardyń halyqaralyq tájiribesin arttyrýǵa jáne jarysqa jan-jaqty daiyndalýyna baǵyttalǵan.
