«Qazaqmys korporatsiiasy» JShS sońǵy jyldardaǵy eń iri investitsiialyq jobalardyń birin iske asyrýǵa kiristi. Kompaniia Qaraǵandy oblysyndaǵy «Nurqazǵan» ken ornynyń Shyǵys ýchaskesinde «Aýa jetkizýshi-klet-2» shahta oqpanynyń qurylysyn bastady. Jobaǵa salynatyn investitsiia kólemi 32,5 mlrd teńgeden asady.
Jańa shahta oqpany ken ornynyń Shyǵys ýchaskesin damytýdyń negizgi elementine ainalyp, «Nurqazǵan» kenishiniń jańa damý kezeńine jol ashady. Onyń qurylysy ken qorlaryn odan ári igerýge, ónerkásiptik qaýipsizdik deńgeiin arttyrýǵa jáne kásiporynnyń aldaǵy ondaǵan jyldardaǵy turaqty jumysyna arnalǵan zamanaýi infraqurylymdy qalyptastyrýǵa múmkindik beredi. Oqpannyń jobalyq tereńdigi 1283,9 metrdi quraidy. Bul ony Qazaqstandaǵy eń tereń shahta oqpanyna ainaldyrady.
Qurylys jumystaryna kompaniia basshylyǵy men eńbek ujymy ókilderiniń qatysýymen ótken saltanatty rásimde resmi túrde bastaý berildi.
«Búgin biz «Nurqazǵan» kenishiniń aldaǵy birneshe onjyldyqtaǵy damýyn aiqyndaityn jobany bastaǵaly turmyz. Bul – adamdardyń qaýipsizdigine, óndiristi damytýǵa jáne kompaniianyń shikizattyq bazasyn nyǵaitýǵa baǵyttalǵan investitsiia. Jańa shahta oqpany ken ornynyń Shyǵys ýchaskesin igerýge, kásiporynnyń turaqty jumysyn qamtamasyz etýge jáne onyń odan ári damýyna jaǵdai jasaýǵa múmkindik beredi», – dedi «Qazaqmys korporatsiiasy» JShS Baqylaý keńesiniń tóraǵasy Nurmuhambet Ábdibekov.
Jańa shahta oqpany jerasty qazbasyn taza aýamen qamtamasyz etýge, jumyskerler men jabdyqty qaýipsiz jetkizýge, sondai-aq ken ornynyń Shyǵys ýchaskesinde jańa ken qoryn ashýǵa múmkindik beredi. Qurylys barysynda 65 myń tekshe metrden astam taý jynysyn qazyp shyǵaryp, shahtanyń qoldanystaǵy deńgeijiekterimen toǵyz túiisý qurylysyn salý qajet.
Jobanyń negizgi maqsaty – ken ornynyń Shyǵys ýchaskesindegi ken qorlaryn ashý, jerasty qazbalaryn taza aýamen jáne jeldetýdiń jobalyq rejimin qamtamasyz etý, sondai-aq jumyskerlerdiń qaýipsiz túsip-shyǵýyna jaǵdai jasaý bolyp tabylady.
Oqpandy úńgileý jumysyn 2031 jyly aiaqtaý josparlanǵan. Odan keiin nysandy zamanaýi tehnologiialyq jabdyqpen jaraqtandyrý kezeńi bastalady. Onyń aiasynda kletti kótergish montajdalyp, bas jeldetkish qondyrǵysy men jerasty qazbalaryna beriletin aýany jylytýǵa arnalǵan modýldik jylý energetikalyq qazandyqpen jabdyqtalady.
Shyǵys ýchaskesin damytý jumysy ekinshi shahta oqpany – «Jeldetkish-2» nysanynyń qurylysymen jalǵasady. Qurylys aiaqtalǵan soń jańa oqpan shahtada paidalanylǵan aýa aǵynyn syrtqa shyǵarýdy, kenishten rezervtik shyǵý jolyn jáne ken qoryn qosymsha igerý múmkindigin qamtamasyz etedi. Eki oqpan birlesip ken ornynyń Shyǵys ýchaskesin tiimdi ári qaýipsiz igerýge qajetti zamanaýi infraqurylym qalyptastyrady.
Mys, altyn jáne kúmis qorlary rastalǵan «Nurqazǵan» ken ornynyń qory taý-ken baiytý kesheniniń 40 jyldan astam turaqty jumysyn qamtamasyz etýge múmkindik beredi. Bul jobany iske asyrý óndiristik qýattardy damytýǵa, ónerkásiptik qaýipsizdik deńgeiin arttyrýǵa jáne kompaniianyń shikizattyq bazasyn nyǵaitýǵa baǵyttalǵan «Qazaqmys» kompaniiasynyń uzaq merzimdi investitsiialyq baǵdarlamasynyń mańyzdy kezeńine ainalady.
