«Qazaqmys korporatsiiasy» JShS Basqarma tóraǵasy Rýslan Óskenáli Qaraǵaily kentine jumys sapary barysynda Qaraǵaily baiytý fabrikasynyń jumysymen tanysty. Sapar aiasynda óndiristik infraqurylymdy jańǵyrtý, tehnologiialyq jabdyqtyń senimdiligin arttyrý jáne kásiporynnyń turaqty jumysyn qamtamasyz etýge baǵyttalǵan investitsiialyq jobalardy iske asyrý máseleleri qaraldy.
Qaraǵaily baiytý fabrikasy «Qaragayly Tau-ken ondirisi» filialynyń quramyna kiredi jáne Abyz, Aqbastaý, Qajyqonǵan ken oryndarynan óndiriletin polimetall kenin óńdeidi. Kásiporynnyń jyldyq óndiristik qýaty 1,4 mln tonna kendi quraidy. Negizgi ónimi – mys kontsentraty jáne pirit kontsentraty.
Óndiristik nysandardy aralaý barysynda fabrikany damytýǵa baǵyttalǵan birinshi kezektegi is-sharalar kesheni qaraldy. Atap aitqanda, súzgileý ýchaskesine jabdyq satyp alý úderisin jedeldetý, qaldyq sharýashylyǵynyń qoiyrtpaq qubyryn aýystyrý, kásiporyndy aýyz sýmen qamtamasyz etetin sý qubyryn jańǵyrtý, sondai-aq usaqtaý korpýsyn qosalqy jáne quramdas bólshektermen qamtamasyz etý máseleleri pysyqtaldy. Atalǵan is-sharalardy júzege asyrý jabdyqtyń senimdi jumysyn qamtamasyz etýge jáne jospardan tys toqtap qalý táýekelderin barynsha azaitýǵa múmkindik beredi.
Kásiporyndy materialdyq-tehnikalyq qamsyzdandyrý máselesine erekshe mán berilýde. «Qaragayly Tau-ken ondirisi» filialynyń 2026 jylǵa arnalǵan investitsiialyq baǵdarlamasy aiasynda jabdyq, material, qosalqy jáne quramdas bólshek satyp alýǵa 5,3 mlrd teńgeden astam qarjy qarastyrylǵan. Onyń ishinde shamamen 3 mlrd teńge Qaraǵaily baiytý fabrikasyna, al 2 mlrd teńgege jýyǵy Aqbastaý, Abyz jáne ózge de kenishterge bólinedi. Qarajat birneshe negizgi óndiristik baǵytty damytýǵa baǵyttalady. Atap aitqanda, súzgileý, usaqtaý jáne konveierlik sharýashylyq ýchaskeleriniń turaqty jumysyn qamtamasyz etýge, qubyr jáne sorǵy infraqurylymyn jańǵyrtýǵa, elektr jabdyqtary men kabel ónimderin, taý-ken jáne tehnologiialyq jabdyqtarǵa arnalǵan qosalqy bólshekterdi, sondai-aq óndiristik mindetterdiń qaýipsiz ári úzdiksiz oryndalýyna qajetti materialdardy satyp alýǵa jumsalady.
Óndiristik bazany odan ári jańartý aiasynda fabrikaǵa qyzmet kórsetýge arnalǵan jańa tieý tehnikasyn satyp alý máselesi qarastyrylýda. Bul óndiristik jumysty jedel oryndaýǵa múmkindik berip, tehnikany jalǵa alý qajettiligin qysqartýǵa yqpal etedi.
Qaraǵaily baiytý fabrikasynyń balansyndaǵy «Sosnovyi bor» ýchaskesin aralaý jumys saparynyń jeke baǵyty boldy. Nysan Qarqaraly memlekettik ulttyq tabiǵi parkiniń aýmaǵynda ornalasqan. Onyń quramyna turǵyn úiler, injenerlik infraqurylym nysandary, qazandyq, sondai-aq sýmen jáne elektr energiiasymen qamtamasyz etý júieleri kiredi. Nysandy aralaý barysynda ǵimarattar men injenerlik jelilerdiń tehnikalyq jaǵdaiy qaralyp, olardy kezeń-kezeńimen jóndeý jáne jańǵyrtý boiynsha alda atqarylatyn jumystar aiqyndaldy.
Qaraǵaily baiytý fabrikasyn jańǵyrtý «Qazaqmys» Tobynyń óndiristik úderistiń senimdiligin arttyrýǵa, tehnologiialyq jabdyqty jańartýǵa jáne zamanaýi eńbek jaǵdaiyn qalyptastyrýǵa baǵyttalǵan uzaq merzimdi investitsiialyq baǵdarlamasynyń bir bóligi bolyp tabylady. Kompaniia óndiristik aktivterdi kezeń-kezeńimen jańǵyrtýǵa turaqty investitsiia salyp, olardyń tiimdi ári turaqty jumysyn qamtamasyz etip keledi.
