Bolonia qalasynda Qazaqstan úshin tarihi mańyzy bar oqiǵa – qazaqy tazynyń álemdik kinologiiadaǵy eń bedeldi sharalardyń biri sanalatyn World Dog Show 2026 baǵdarlamasyna qatysýy sátti aiaqtaldy, dep habarlaidy ult.kz Qazaqstan kinologtar odaǵyna silteme jasap.
2026 jylǵy 2–7 maýsym aralyǵynda halyqaralyq kinologiialyq qaýymdastyqtyń nazary Italiiaǵa aýdy. Munda álemniń túkpir-túkpirinen kelgen tóreshiler, sarapshylar, selektsionerler, it ieleri jáne ulttyq kinologiialyq uiymdardyń ókilderi bas qosty. Qazaqstan úshin bul sharanyń mańyzy erekshe boldy, óitkeni álemdik deńgeidegi basty alańdardyń birinde 2024 jyly Halyqaralyq kinologiialyq federatsiianyń (FCI) aldyn ala moiyndaýyna ie bolǵan ulttyq tuqym – qazaqy tazy tanystyryldy.
Foto: Qazaqstan kinologtar odaǵy
Qazaqstan kinologtar odaǵynyń World Dog Show 2026 kórmesine qatysýy qazaqy tazyny túpkilikti halyqaralyq deńgeide moiyndatýǵa baǵyttalǵan júieli jumystyń mańyzdy kezeńine ainaldy.
Is-shara aiasynda 2 maýsym kúni ótken FCI tóreshileriniń IV dúniejúzilik kongresine qatysýdyń mańyzy zor boldy. Bul – álemniń túkpir-túkpirinen kelgen sarapshy-tóreshiler bas qosatyn kásibi alań. Kongress barysynda Qazaqstan kinologtar odaǵy qazaqy tazyǵa arnalǵan arnaiy dáris ótkizdi. Halyqaralyq tóreshiler korpýsyna tuqymnyń tarihy, onyń qazaq halqynyń dástúrli mádenietimen bailanysy, tazynyń ańshylyq tekti tazylar sanatyndaǵy qyzmettik ereksheligi, tuqymdyq tipi, ekstereri, qozǵalys máneri, minez-qulqy jáne ringtegi baǵalaý erekshelikteri tanystyryldy.
Foto: Qazaqstan kinologtar odaǵy
Mundai format tuqymdy tanystyrýmen qatar, FCI tóreshileri arasynda qazaqy tazy týraly durys kásibi túsinik qalyptastyrýǵa múmkindik berdi. Bul aldyn ala halyqaralyq moiyndaý kezeńinde asa mańyzdy, óitkeni álemdik arenadaǵy árbir kórsetilim tuqymnyń bolashaqtaǵy qabyldanýyna, damýyna jáne túpkilikti moiyndalýyna tikelei áser etedi.
Qazaqstannyń World Dog Show 2026 kórmesine qatysýynyń mańyzdy bóligi qazaqy tazyǵa arnalǵan Qazaqstan kinologtar odaǵynyń tanystyrý stendi boldy.
Qazaqstannyń ulttyq stendi kórmeniń dál ortalyǵynda ornalasyp, alǵashqy kúnnen-aq World Dog Show 2026 kórmesiniń eń kórnekti ári kópshilik jinalatyn alańdarynyń birine ainaldy. Ol tóreshilerdiń, selektsionerlerdiń, it ieleriniń, ulttyq kinologiialyq uiymdar ókilderiniń, kórme qonaqtarynyń jáne halyqaralyq buqaralyq aqparat quraldarynyń erekshe qyzyǵýshylyǵyn týdyrdy.
Stendke kelgen qonaqtar qazaqy tazynyń tarihymen, onyń qyzmettik ereksheligimen, tuqymdyq sipattarymen, qazirgi selektsiialyq jumystyń jai-kúiimen jáne Qazaqstannyń osy tuqymnyń otany retindegi rólimen tanysý múmkindigine ie boldy.
Stend tek aqparattyq alań ǵana emes, naǵyz tartymdy ortalyqqa ainaldy. Kóptegen qonaqtar stend janynda aialdap, Qazaqstan ókilderimen pikir almasyp, estelik sýretke tústi. Kórmege qatysýshylar men qonaqtardyń pikirinshe, Qazaqstannyń ulttyq stendi World Dog Show 2026 kórmesindegi eń jarqyn, mazmundy ári este qalarlyq ekspozitsiialardyń biri boldy.
Qazaqstannyń qatysýyndaǵy basty sátterdiń biri 5 jáne 6 maýsym kúnderi ótken qazaqy tazylardyń ringtik kórsetilimderi boldy. Tuqym ókilderi birden úsh mańyzdy kórme kezeńine qatysty: Club Show 2026, ENCI Winner 2026 jáne World Dog Show 2026.
Foto: Qazaqstan kinologtar odaǵy
Eń basty ortaq nátije – barlyq qazaqy tazylar eshbir ereksheliksiz «Óte jaqsy» («Excellent») baǵasyn aldy. Bul kórsetkish usynylǵan itterdiń joǵary sapasyn ǵana emes, sonymen qatar Qazaqstanda ulttyq tuqymdy saqtaý men damytý baǵytyndaǵy selektsiialyq jumystyń júieli ári durys jolǵa qoiylǵanyn dáleldeidi.
2026 jylǵy 5 maýsymda qazaqy tazy Italiianyń ulttyq deńgeidegi Club Show 2026 kórmesinde tanystyryldy.
Club Show 2026 qorytyndysy boiynsha Astanadan kelgen Aqtaban úzdik jas atalyq, Almatydan kelgen Tabiǵat úzdik jas analyq atandy. Astanalyq Lashyn úzdik atalyq, al Reia úzdik analyq dep tanyldy. Qorytyndy salystyrý nátijesinde Lashyn tuqymnyń úzdik ókili atanyp, Club Show 2026 jeńimpazy boldy.
Sol kúni qazaqy tazylar halyqaralyq deńgeidegi ENCI Winner 2026 kórmesine de qatysty. Astanadan kelgen Chelsi úzdik jas atalyq, Almatydan kelgen Tabiǵat úzdik jas analyq atandy. Pers úzdik atalyq, al Reia úzdik analyq dep tanyldy. Tuqymnyń úzdik ókili ári ENCI Winner 2026 jeńimpazy ataǵyn Pers ielendi.
Perstiń tarihi jetistigi erekshe nazar aýdarýǵa turarlyq. Tuqym ishindegi jeńisinen keiin ol óz jas sanatyndaǵy basqa tazylarmen baq synasyp, tórtinshi orynǵa ie boldy. Qazaqy tazy úshin mundai deńgeidegi halyqaralyq alańda qol jetkizilgen nátije tuqymdy álemge tanytý jolyndaǵy mańyzdy jetistik ári jańa beles boldy.
Foto: Qazaqstan kinologtar odaǵy
2026 jylǵy 6 maýsymda qazaqy tazy FCI júiesindegi álem chempionaty sanalatyn Dúniejúzilik itter kórmesiniń negizgi baǵdarlamasy – World Dog Show 2026 aiasynda tanystyryldy.
World Dog Show 2026 qorytyndysy boiynsha Almatydan kelgen Chelsi úzdik jas atalyq, al Almatydan kelgen Tabiǵat úzdik jas analyq atandy. Astanalyq Lashyn úzdik atalyq, al Reia úzdik analyq dep tanyldy. Tuqymnyń úzdik ókili ári World Dog Show 2026 jeńimpazy ataǵyn Lashyn ielendi.
Tuqym ishindegi jeńisten keiin Chelsi men Lashyn ózderiniń jas ereksheligi sanattarynda basqa tazylarmen saiysty jalǵastyrdy. Qorytyndy salystyrý nátijesinde Chelsi tórtinshi orynǵa ie bolyp, qazaqy tazy úshin álemdik kórme alańyndaǵy taǵy bir tarihi jetistikke qol jetkizdi.
World Dog Show 2026 nátijesi boiynsha Chelsi men Tabiǵat Jas álem chempiony ataǵyna ie boldy. Al Lashyn men Reia Álem chempiony titýldaryn jeńip aldy.
Osylaisha, kórme baǵdarlamasynyń qorytyndysy boiynsha Daster, Lashyn, Reia, Pers, Arlan jáne Kerbez Italiia chempiony ataǵyn ielendi. Al Sarbaz chempiondar synybynyń rezervtik jeńimpazy atandy. Chelsi, Tabiǵat jáne Aqtaban Jas Italiia chempiony titýldaryna qol jetkizdi.
Bul nátijeler Qazaqstan úshin erekshe mańyzǵa ie. Qazaqy tazy World Dog Show 2026 kórmesinde jai ǵana tanystyrylyp qoiǵan joq – tuqym álemdik arenada óz múmkindigin senimdi túrde kórsetip, halyqaralyq sarapshylardyń joǵary baǵasyna ie boldy, halyqaralyq qaýymdastyqtyń nazaryn aýdardy jáne óziniń turaqty tuqymdyq deńgeiin dáleldedi.
Qazaqstan kinologtar odaǵy úshin jeńister men titýldar mańyzdy bolǵanymen, basty nátije budan da aýqymdy. Qazaqy tazy halyqaralyq kinologiiada barǵan saiyn tanymal bola túsýde, al Qazaqstan osy biregei tuqymnyń tarihi otany ári ony saqtaý, damytý jáne ilgeriletý baǵytyndaǵy júieli jumystyń negizgi ortalyǵy retindegi mártebesin taǵy bir márte rastady.
Qazaqstannyń World Dog Show 2026 kórmesine qatysýynyń taǵy bir jarqyn sáti qazaqy tazynyń halyqaralyq TOP Dog 2026 shoýyndaǵy óner kórsetýi boldy.
TOP Dog – bul ringtegi dástúrli saraptamalyq baǵalaý emes, keń aýditoriiaǵa, buqaralyq aqparat quraldaryna jáne álemdik kórme qaýymdastyǵyna baǵyttalǵan áserli halyqaralyq shoý. Dál osy alańda tuqym tek mamandarǵa ǵana emes, myńdaǵan kórermenge óz eliniń mádeni kelbetiniń bir bóligi retinde tanystyrylady.
Osy bedeldi alańda Qazaqstan alǵash ret tanystyryldy. Arenadaǵy basty ekranda Qazaqstan Respýblikasynyń Memlekettik Týy kórsetilip, elimizdiń ataýy halyqaralyq kinologiialyq qaýymdastyq aldynda saltanatty túrde jariialandy.
Arenada Qazaqstannyń atynan Astanadan kelgen qazaqy tazy Daster, hendler Karina Kamibaeva jáne Qazaqstan kinologtar odaǵynyń prezidenti Serikqali Baýyrjan óner kórsetti.
Bul jai ǵana kórme baǵdarlamasynyń bir bóligi emes, qazaqy tazynyń tarihi otany retinde Qazaqstandy álemdik kinologiianyń eń bedeldi alańdarynyń birinde tanytqan mańyzdy simvoldyq sát boldy.
Qazaqy tazynyń TOP Dog 2026 shoýyndaǵy kórsetilimi Qazaqstannyń World Dog Show 2026 kórmesine qatysýynyń eń áserli ári este qalarlyq sátteriniń birine ainaldy. Bul alańda tazy ózindik bolmysy bar, tanymal ári halyqaralyq kinologiiada laiyqty oryn alýǵa qabiletti tuqym retinde tanystyryldy.
Eske sala keteiik, qazaqy it tuqymdaryn saqtaý jáne damytý máseleleri Memleket basshysynyń tapsyrmasy boiynsha júieli túrde qolǵa alyndy. Osyǵan bailanysty 2023 jylǵy 3 qańtarda qazaqy it tuqymdaryn saqtaý jáne ósimin molaitý máseleleri jónindegi Qazaqstan Respýblikasynyń Zańy qabyldanyp, atalǵan baǵyttaǵy jumystyń quqyqtyq negizi bekitildi.
2024 jylǵy 3 qyrkúiekte FCI «Qazaqy tazy» tuqymyn aldyn ala negizde tanyp, Qazaqstanǵa osy tuqymnyń shyqqan eli mártebesin resmi túrde bekitti. Belgilengen kezeń ishinde Qazaqstan tuqymdy damytý jumystaryn jalǵastyryp, onyń túpkilikti moiyndalýyna qajetti asyl tuqymdyq, kórmelik jáne ózge de derekterdi jinaqtaýy tiis.
Qazaqy tazynyń Bolonia qalasynda ótken World Dog Show 2026 kórmesine qatysýy osy joldaǵy mańyzdy beles boldy. Búginde qazaqy tazynyń halyqaralyq arenaǵa senimdi túrde shyǵyp, álemdik kinologiiadaǵy óz ornyn ielenip kele jatqanyn nyq senimmen aitýǵa bolady.
