بولونيا قالاسىندا قازاقستان ٷشٸن تاريحي ماڭىزى بار وقيعا – قازاقى تازىنىڭ ەلەمدٸك كينولوگيياداعى ەڭ بەدەلدٸ شارالاردىڭ بٸرٸ سانالاتىن World Dog Show 2026 باعدارلاماسىنا قاتىسۋى سەتتٸ اياقتالدى, دەپ حابارلايدى ult.kz قازاقستان كينولوگتار وداعىنا سٸلتەمە جاساپ.
2026 جىلعى 2–7 ماۋسىم ارالىعىندا حالىقارالىق كينولوگييالىق قاۋىمداستىقتىڭ نازارى يتاليياعا اۋدى. مۇندا ەلەمنٸڭ تٷكپٸر-تٷكپٸرٸنەن كەلگەن تٶرەشٸلەر, ساراپشىلار, سەلەكتسيونەرلەر, يت يەلەرٸ جەنە ۇلتتىق كينولوگييالىق ۇيىمداردىڭ ٶكٸلدەرٸ باس قوستى. قازاقستان ٷشٸن بۇل شارانىڭ ماڭىزى ەرەكشە بولدى, ٶيتكەنٸ ەلەمدٸك دەڭگەيدەگٸ باستى الاڭداردىڭ بٸرٸندە 2024 جىلى حالىقارالىق كينولوگييالىق فەدەراتسييانىڭ (FCI) الدىن الا مويىنداۋىنا يە بولعان ۇلتتىق تۇقىم – قازاقى تازى تانىستىرىلدى.
فوتو: قازاقستان كينولوگتار وداعى
قازاقستان كينولوگتار وداعىنىڭ World Dog Show 2026 كٶرمەسٸنە قاتىسۋى قازاقى تازىنى تٷپكٸلٸكتٸ حالىقارالىق دەڭگەيدە مويىنداتۋعا باعىتتالعان جٷيەلٸ جۇمىستىڭ ماڭىزدى كەزەڭٸنە اينالدى.
ٸس-شارا اياسىندا 2 ماۋسىم كٷنٸ ٶتكەن FCI تٶرەشٸلەرٸنٸڭ IV دٷنيەجٷزٸلٸك كونگرەسٸنە قاتىسۋدىڭ ماڭىزى زور بولدى. بۇل – ەلەمنٸڭ تٷكپٸر-تٷكپٸرٸنەن كەلگەن ساراپشى-تٶرەشٸلەر باس قوساتىن كەسٸبي الاڭ. كونگرەسس بارىسىندا قازاقستان كينولوگتار وداعى قازاقى تازىعا ارنالعان ارنايى دەرٸس ٶتكٸزدٸ. حالىقارالىق تٶرەشٸلەر كورپۋسىنا تۇقىمنىڭ تاريحى, ونىڭ قازاق حالقىنىڭ دەستٷرلٸ مەدەنيەتٸمەن بايلانىسى, تازىنىڭ اڭشىلىق تەكتٸ تازىلار ساناتىنداعى قىزمەتتٸك ەرەكشەلٸگٸ, تۇقىمدىق تيپٸ, ەكستەرەرٸ, قوزعالىس مەنەرٸ, مٸنەز-قۇلقى جەنە رينگتەگٸ باعالاۋ ەرەكشەلٸكتەرٸ تانىستىرىلدى.
فوتو: قازاقستان كينولوگتار وداعى
مۇنداي فورمات تۇقىمدى تانىستىرۋمەن قاتار, FCI تٶرەشٸلەرٸ اراسىندا قازاقى تازى تۋرالى دۇرىس كەسٸبي تٷسٸنٸك قالىپتاستىرۋعا مٷمكٸندٸك بەردٸ. بۇل الدىن الا حالىقارالىق مويىنداۋ كەزەڭٸندە اسا ماڭىزدى, ٶيتكەنٸ ەلەمدٸك ارەناداعى ەربٸر كٶرسەتٸلٸم تۇقىمنىڭ بولاشاقتاعى قابىلدانۋىنا, دامۋىنا جەنە تٷپكٸلٸكتٸ مويىندالۋىنا تٸكەلەي ەسەر ەتەدٸ.
قازاقستاننىڭ World Dog Show 2026 كٶرمەسٸنە قاتىسۋىنىڭ ماڭىزدى بٶلٸگٸ قازاقى تازىعا ارنالعان قازاقستان كينولوگتار وداعىنىڭ تانىستىرۋ ستەندٸ بولدى.
قازاقستاننىڭ ۇلتتىق ستەندٸ كٶرمەنٸڭ دەل ورتالىعىندا ورنالاسىپ, العاشقى كٷننەن-اق World Dog Show 2026 كٶرمەسٸنٸڭ ەڭ كٶرنەكتٸ ەرٸ كٶپشٸلٸك جينالاتىن الاڭدارىنىڭ بٸرٸنە اينالدى. ول تٶرەشٸلەردٸڭ, سەلەكتسيونەرلەردٸڭ, يت يەلەرٸنٸڭ, ۇلتتىق كينولوگييالىق ۇيىمدار ٶكٸلدەرٸنٸڭ, كٶرمە قوناقتارىنىڭ جەنە حالىقارالىق بۇقارالىق اقپارات قۇرالدارىنىڭ ەرەكشە قىزىعۋشىلىعىن تۋدىردى.
ستەندكە كەلگەن قوناقتار قازاقى تازىنىڭ تاريحىمەن, ونىڭ قىزمەتتٸك ەرەكشەلٸگٸمەن, تۇقىمدىق سيپاتتارىمەن, قازٸرگٸ سەلەكتسييالىق جۇمىستىڭ جاي-كٷيٸمەن جەنە قازاقستاننىڭ وسى تۇقىمنىڭ وتانى رەتٸندەگٸ رٶلٸمەن تانىسۋ مٷمكٸندٸگٸنە يە بولدى.
ستەند تەك اقپاراتتىق الاڭ عانا ەمەس, ناعىز تارتىمدى ورتالىققا اينالدى. كٶپتەگەن قوناقتار ستەند جانىندا ايالداپ, قازاقستان ٶكٸلدەرٸمەن پٸكٸر الماسىپ, ەستەلٸك سۋرەتكە تٷستٸ. كٶرمەگە قاتىسۋشىلار مەن قوناقتاردىڭ پٸكٸرٸنشە, قازاقستاننىڭ ۇلتتىق ستەندٸ World Dog Show 2026 كٶرمەسٸندەگٸ ەڭ جارقىن, مازمۇندى ەرٸ ەستە قالارلىق ەكسپوزيتسييالاردىڭ بٸرٸ بولدى.
قازاقستاننىڭ قاتىسۋىنداعى باستى سەتتەردٸڭ بٸرٸ 5 جەنە 6 ماۋسىم كٷندەرٸ ٶتكەن قازاقى تازىلاردىڭ رينگتٸك كٶرسەتٸلٸمدەرٸ بولدى. تۇقىم ٶكٸلدەرٸ بٸردەن ٷش ماڭىزدى كٶرمە كەزەڭٸنە قاتىستى: Club Show 2026, ENCI Winner 2026 جەنە World Dog Show 2026.
فوتو: قازاقستان كينولوگتار وداعى
ەڭ باستى ورتاق نەتيجە – بارلىق قازاقى تازىلار ەشبٸر ەرەكشەلٸكسٸز «ٶتە جاقسى» («Excellent») باعاسىن الدى. بۇل كٶرسەتكٸش ۇسىنىلعان يتتەردٸڭ جوعارى ساپاسىن عانا ەمەس, سونىمەن قاتار قازاقستاندا ۇلتتىق تۇقىمدى ساقتاۋ مەن دامىتۋ باعىتىنداعى سەلەكتسييالىق جۇمىستىڭ جٷيەلٸ ەرٸ دۇرىس جولعا قويىلعانىن دەلەلدەيدٸ.
2026 جىلعى 5 ماۋسىمدا قازاقى تازى يتالييانىڭ ۇلتتىق دەڭگەيدەگٸ Club Show 2026 كٶرمەسٸندە تانىستىرىلدى.
Club Show 2026 قورىتىندىسى بويىنشا استانادان كەلگەن اقتابان ٷزدٸك جاس اتالىق, الماتىدان كەلگەن تابيعات ٷزدٸك جاس انالىق اتاندى. استانالىق لاشىن ٷزدٸك اتالىق, ال رەيا ٷزدٸك انالىق دەپ تانىلدى. قورىتىندى سالىستىرۋ نەتيجەسٸندە لاشىن تۇقىمنىڭ ٷزدٸك ٶكٸلٸ اتانىپ, Club Show 2026 جەڭٸمپازى بولدى.
سول كٷنٸ قازاقى تازىلار حالىقارالىق دەڭگەيدەگٸ ENCI Winner 2026 كٶرمەسٸنە دە قاتىستى. استانادان كەلگەن چەلسي ٷزدٸك جاس اتالىق, الماتىدان كەلگەن تابيعات ٷزدٸك جاس انالىق اتاندى. پەرس ٷزدٸك اتالىق, ال رەيا ٷزدٸك انالىق دەپ تانىلدى. تۇقىمنىڭ ٷزدٸك ٶكٸلٸ ەرٸ ENCI Winner 2026 جەڭٸمپازى اتاعىن پەرس يەلەندٸ.
پەرستٸڭ تاريحي جەتٸستٸگٸ ەرەكشە نازار اۋدارۋعا تۇرارلىق. تۇقىم ٸشٸندەگٸ جەڭٸسٸنەن كەيٸن ول ٶز جاس ساناتىنداعى باسقا تازىلارمەن باق سىناسىپ, تٶرتٸنشٸ ورىنعا يە بولدى. قازاقى تازى ٷشٸن مۇنداي دەڭگەيدەگٸ حالىقارالىق الاڭدا قول جەتكٸزٸلگەن نەتيجە تۇقىمدى ەلەمگە تانىتۋ جولىنداعى ماڭىزدى جەتٸستٸك ەرٸ جاڭا بەلەس بولدى.
فوتو: قازاقستان كينولوگتار وداعى
2026 جىلعى 6 ماۋسىمدا قازاقى تازى FCI جٷيەسٸندەگٸ ەلەم چەمپيوناتى سانالاتىن دٷنيەجٷزٸلٸك يتتەر كٶرمەسٸنٸڭ نەگٸزگٸ باعدارلاماسى – World Dog Show 2026 اياسىندا تانىستىرىلدى.
World Dog Show 2026 قورىتىندىسى بويىنشا الماتىدان كەلگەن چەلسي ٷزدٸك جاس اتالىق, ال الماتىدان كەلگەن تابيعات ٷزدٸك جاس انالىق اتاندى. استانالىق لاشىن ٷزدٸك اتالىق, ال رەيا ٷزدٸك انالىق دەپ تانىلدى. تۇقىمنىڭ ٷزدٸك ٶكٸلٸ ەرٸ World Dog Show 2026 جەڭٸمپازى اتاعىن لاشىن يەلەندٸ.
تۇقىم ٸشٸندەگٸ جەڭٸستەن كەيٸن چەلسي مەن لاشىن ٶزدەرٸنٸڭ جاس ەرەكشەلٸگٸ ساناتتارىندا باسقا تازىلارمەن سايىستى جالعاستىردى. قورىتىندى سالىستىرۋ نەتيجەسٸندە چەلسي تٶرتٸنشٸ ورىنعا يە بولىپ, قازاقى تازى ٷشٸن ەلەمدٸك كٶرمە الاڭىنداعى تاعى بٸر تاريحي جەتٸستٸككە قول جەتكٸزدٸ.
World Dog Show 2026 نەتيجەسٸ بويىنشا چەلسي مەن تابيعات جاس ەلەم چەمپيونى اتاعىنا يە بولدى. ال لاشىن مەن رەيا ەلەم چەمپيونى تيتۋلدارىن جەڭٸپ الدى.
وسىلايشا, كٶرمە باعدارلاماسىنىڭ قورىتىندىسى بويىنشا داستەر, لاشىن, رەيا, پەرس, ارلان جەنە كەربەز يتالييا چەمپيونى اتاعىن يەلەندٸ. ال سارباز چەمپيوندار سىنىبىنىڭ رەزەرۆتٸك جەڭٸمپازى اتاندى. چەلسي, تابيعات جەنە اقتابان جاس يتالييا چەمپيونى تيتۋلدارىنا قول جەتكٸزدٸ.
بۇل نەتيجەلەر قازاقستان ٷشٸن ەرەكشە ماڭىزعا يە. قازاقى تازى World Dog Show 2026 كٶرمەسٸندە جاي عانا تانىستىرىلىپ قويعان جوق – تۇقىم ەلەمدٸك ارەنادا ٶز مٷمكٸندٸگٸن سەنٸمدٸ تٷردە كٶرسەتٸپ, حالىقارالىق ساراپشىلاردىڭ جوعارى باعاسىنا يە بولدى, حالىقارالىق قاۋىمداستىقتىڭ نازارىن اۋداردى جەنە ٶزٸنٸڭ تۇراقتى تۇقىمدىق دەڭگەيٸن دەلەلدەدٸ.
قازاقستان كينولوگتار وداعى ٷشٸن جەڭٸستەر مەن تيتۋلدار ماڭىزدى بولعانىمەن, باستى نەتيجە بۇدان دا اۋقىمدى. قازاقى تازى حالىقارالىق كينولوگييادا بارعان سايىن تانىمال بولا تٷسۋدە, ال قازاقستان وسى بٸرەگەي تۇقىمنىڭ تاريحي وتانى ەرٸ ونى ساقتاۋ, دامىتۋ جەنە ٸلگەرٸلەتۋ باعىتىنداعى جٷيەلٸ جۇمىستىڭ نەگٸزگٸ ورتالىعى رەتٸندەگٸ مەرتەبەسٸن تاعى بٸر مەرتە راستادى.
قازاقستاننىڭ World Dog Show 2026 كٶرمەسٸنە قاتىسۋىنىڭ تاعى بٸر جارقىن سەتٸ قازاقى تازىنىڭ حالىقارالىق TOP Dog 2026 شوۋىنداعى ٶنەر كٶرسەتۋٸ بولدى.
TOP Dog – بۇل رينگتەگٸ دەستٷرلٸ ساراپتامالىق باعالاۋ ەمەس, كەڭ اۋديتوريياعا, بۇقارالىق اقپارات قۇرالدارىنا جەنە ەلەمدٸك كٶرمە قاۋىمداستىعىنا باعىتتالعان ەسەرلٸ حالىقارالىق شوۋ. دەل وسى الاڭدا تۇقىم تەك ماماندارعا عانا ەمەس, مىڭداعان كٶرەرمەنگە ٶز ەلٸنٸڭ مەدەني كەلبەتٸنٸڭ بٸر بٶلٸگٸ رەتٸندە تانىستىرىلادى.
وسى بەدەلدٸ الاڭدا قازاقستان العاش رەت تانىستىرىلدى. ارەناداعى باستى ەكراندا قازاقستان رەسپۋبليكاسىنىڭ مەملەكەتتٸك تۋى كٶرسەتٸلٸپ, ەلٸمٸزدٸڭ اتاۋى حالىقارالىق كينولوگييالىق قاۋىمداستىق الدىندا سالتاناتتى تٷردە جارييالاندى.
ارەنادا قازاقستاننىڭ اتىنان استانادان كەلگەن قازاقى تازى داستەر, حەندلەر كارينا كاميباەۆا جەنە قازاقستان كينولوگتار وداعىنىڭ پرەزيدەنتٸ سەرٸكقالي باۋىرجان ٶنەر كٶرسەتتٸ.
بۇل جاي عانا كٶرمە باعدارلاماسىنىڭ بٸر بٶلٸگٸ ەمەس, قازاقى تازىنىڭ تاريحي وتانى رەتٸندە قازاقستاندى ەلەمدٸك كينولوگييانىڭ ەڭ بەدەلدٸ الاڭدارىنىڭ بٸرٸندە تانىتقان ماڭىزدى سيمۆولدىق سەت بولدى.
قازاقى تازىنىڭ TOP Dog 2026 شوۋىنداعى كٶرسەتٸلٸمٸ قازاقستاننىڭ World Dog Show 2026 كٶرمەسٸنە قاتىسۋىنىڭ ەڭ ەسەرلٸ ەرٸ ەستە قالارلىق سەتتەرٸنٸڭ بٸرٸنە اينالدى. بۇل الاڭدا تازى ٶزٸندٸك بولمىسى بار, تانىمال ەرٸ حالىقارالىق كينولوگييادا لايىقتى ورىن الۋعا قابٸلەتتٸ تۇقىم رەتٸندە تانىستىرىلدى.
ەسكە سالا كەتەيٸك, قازاقى يت تۇقىمدارىن ساقتاۋ جەنە دامىتۋ مەسەلەلەرٸ مەملەكەت باسشىسىنىڭ تاپسىرماسى بويىنشا جٷيەلٸ تٷردە قولعا الىندى. وسىعان بايلانىستى 2023 جىلعى 3 قاڭتاردا قازاقى يت تۇقىمدارىن ساقتاۋ جەنە ٶسٸمٸن مولايتۋ مەسەلەلەرٸ جٶنٸندەگٸ قازاقستان رەسپۋبليكاسىنىڭ زاڭى قابىلدانىپ, اتالعان باعىتتاعى جۇمىستىڭ قۇقىقتىق نەگٸزٸ بەكٸتٸلدٸ.
2024 جىلعى 3 قىركٷيەكتە FCI «قازاقى تازى» تۇقىمىن الدىن الا نەگٸزدە تانىپ, قازاقستانعا وسى تۇقىمنىڭ شىققان ەلٸ مەرتەبەسٸن رەسمي تٷردە بەكٸتتٸ. بەلگٸلەنگەن كەزەڭ ٸشٸندە قازاقستان تۇقىمدى دامىتۋ جۇمىستارىن جالعاستىرىپ, ونىڭ تٷپكٸلٸكتٸ مويىندالۋىنا قاجەتتٸ اسىل تۇقىمدىق, كٶرمەلٸك جەنە ٶزگە دە دەرەكتەردٸ جيناقتاۋى تيٸس.
قازاقى تازىنىڭ بولونيا قالاسىندا ٶتكەن World Dog Show 2026 كٶرمەسٸنە قاتىسۋى وسى جولداعى ماڭىزدى بەلەس بولدى. بٷگٸندە قازاقى تازىنىڭ حالىقارالىق ارەناعا سەنٸمدٸ تٷردە شىعىپ, ەلەمدٸك كينولوگيياداعى ٶز ورنىن يەلەنٸپ كەلە جاتقانىن نىق سەنٸممەن ايتۋعا بولادى.
