Memleket basshysy Qasym-Jomart Toqaev Beibitshilik keńesiniń aǵa keńesshisi Are Laitstoýnmen kezdesý ótkizdi, dep habarlaidy ult.kz.
Kezdesý barysynda Prezident Qazaqstannyń Beibitshilik keńesine qatysýynyń mańyzyn atap ótip, uiym aiasynda ózara tiimdi yntymaqtastyqty damytýǵa múddeli ekenin jetkizdi.
– Biz Beibitshilik keńesiniń negizin qalaýshylardyń biri retinde bul institýttyń jahandyq qaýipsizdik pen halyqaralyq dialogty nyǵaitýǵa eleýli úles qosa alatynyna senimdimiz, – dedi Memleket basshysy.
Taraptar áńgime barysynda Gaza sektoryndaǵy jaǵdaidy turaqtandyrýǵa baǵyttalǵan Qazaqstannyń bastamalaryn talqylady. Atap aitqanda, áleýmettik infraqurylymdy qalpyna keltirý, bilim berý men densaýlyq saqtaý jobalaryn júzege asyrý, sondai-aq azyq-túlik qaýipsizdigin qamtamasyz etý máseleleri sóz boldy.
Are Laitstoýn Qazaqstan halqyn jáne Prezident Qasym-Jomart Toqaevty Memlekettik rámizder kúnimen quttyqtap, elge beibitshilik pen ósip-órkendeý tiledi. Sonymen qatar ol AQSh prezidenti Donald Tramptyń ystyq yqylasy men sálemin jetkizdi.
Kezdesý barysynda Qazaqstannyń halyqaralyq uiymdardaǵy belsendi qyzmeti de talqylandy. Beibitshilik keńesiniń ókili elimizdiń túrli halyqaralyq bastamalarǵa qatysýyn jáne Ibrahim kelisimderine qosylý týraly sheshimin joǵary baǵalady.
Sondai-aq taraptar kólik jáne logistika salasyndaǵy áriptestikti, TRIPP jobasy men Middle Corridor Orta dáliz aiasyndaǵy yqpaldastyqtyń keleshegin qarastyrdy. Qazaqstannyń óńiraralyq bailanysty nyǵaitýǵa jáne halyqaralyq kólik baǵyttaryn ártaraptandyrýǵa erekshe qyzyǵýshylyq tanytyp otyrǵany aityldy.
Kezdesý qorytyndysynda Qasym-Jomart Toqaev pen Are Laitstoýn ekijaqty jáne kópjaqty kún tártibindegi ózekti máseleler boiynsha yntymaqtastyqty odan ári tereńdetýge daiyn ekenin rastady.
