Shri-Lankanyń batys bóligindegi Angýrývatota qalasynda ornalasqan qarttar úiinde shyqqan órt saldarynan keminde 12 adam qaza taýyp, taǵy 8 adam jaraqat aldy. Qaiǵyly oqiǵa 3 maýsym kúni túnde bolǵan, dep habarlaidy ult.kz.
Politsiianyń málimetinshe, órt kezinde ǵimaratta 71 adam bolǵan. Qutqarýshylar men jergilikti turǵyndardyń kómegimen 51 adam qaýipsiz jerge kóshirildi. Zardap shekkender aýrýhanalarǵa jetkizilgen. Qarttar úiinde egde jastaǵy adamdarmen qatar psihikalyq aýrýlary bar turǵyndar da bolǵan.
Tergeý barysynda bul mekemeniń resmi tirkeýden ótpegeni anyqtaldy. Sondai-aq ǵimarattyń syiymdylyǵy nebári 15 adamǵa eseptelgenimen, onda 71 adam turǵany belgili boldy. Buǵan deiin memlekettik organdar mekeme basshylyǵyna birneshe ret eskertý jasaǵan.
Aldyn ala málimet boiynsha, órt matrastar saqtalǵan qoima bólmesinen bastalǵan bolýy múmkin. Alaida tilsiz jaýdyń naqty shyǵý sebebi áli anyqtalǵan joq.
Oqiǵadan keiin qarttar úiiniń direktory nemqurailylyq saldarynan adam ólimine jol berdi degen kúdikpen ustaldy. Sot ony tergeý aiaqtalǵanǵa deiin qamaýda ustaý týraly sheshim shyǵardy.
