Foto: Qarmet
Óndiristi jańǵyrtý baǵdarlamasy aiasynda Qarmet metallýrgiia kombinatynda domna óndirisin tabiǵi gazǵa kóshirý aiaqtaldy. Gaz qubyrynyń qurylysy 2024 jyly bastalyp, 2025 jyldyń tamyzynda №2 domna peshine alǵash ret gaz berildi. Qyrkúiekte №3 pesh qosyldy, al qazan aiynyń sońynda – №4 peshte gazǵa aýystyryldy. Osylaisha, búginde Qarmet kompaniiasynyń barlyq domna peshteri tolyqtai tabiǵi gazben jumys isteidi.
Gaz tartý jobasynyń basty maqsattarynyń biri – mazýttan tolyq bas tartyp, ekologiialyq ári tiimdi otyn kózine kóshý. Metallýrgter táýligine 250 tonnadan astam mazýtty paidalanýdy toqtatty. Qazir mamandar koksty tutynýdy azaitýǵa kóńil bólýde: №3 peshte bul kórsetkish tonnasyna 500 kilogramnan tómen deńgeige jetti, al №2 jáne №4 peshterde tehnologiialyq rejimder baptalýda. Jeltoqsanǵa qarai barlyq agregattar boiynsha osyndai nátijege qol jetkizý josparlanyp otyr.
«Men domna tsehynda 25 jyl jumys isteimin, jáne alǵash ret tabiǵi gaz paidalandyq. Qazir úirenip jatyrmyz, nátijesi de kórinip tur. Ónimdilik artty, kokstyń shyǵyny azaidy, bul shoiynnyń ózindik qunyn tómendetti. Bul – úlken jetistik», — dedi №4 domna peshiniń óndiristik ýchaske bastyǵy Ashat Serikbaev.
2026 jyly tabiǵi gazǵa áktas kúidirý tsehyn, konverterlik tsehty, myryshtaý jelilerin jáne jylý elektr ortalyqtaryn kóshirý josparlanǵan. Bul shyǵyndardy azaitýǵa, óndiristiń turaqtylyǵy men ekologiialyq tiimdiligin arttyrýǵa múmkindik beredi. Nátijesinde Qarmet Qazaqstandaǵy eń energiia únemdeýshi ári zamanaýi metallýrgiialyq kásiporyndardyń birine ainalmaq.
