Eńbekshiqazaq aýdanynyń turǵyny ózine kólik satyp alýǵa kelgen azamatty pyshaqtap, 10 million teńgesin alyp ketken, dep habarlaidy «Ult aqparat» Almaty oblysynyń politsiia departamentiniń baspasóz qyzmetine silteme jasap.
«Eńbekshiqazaq aýdany politsiia basqarmasynyń kezekshi bólimine aýrýhanaǵa arqa tusyna suǵylǵan pyshaq jaraqaty bar 33 jastaǵy Almaty qalasynyń turǵyny jetkizilgeni týraly habar tústi. Aýrýhanaǵa jetken jedel tergeý toby atalǵan faktini rastap, izdeý sharalaryn bastap ketti. Keiin satýshymen kezdesý kezinde kúdikti sýyq qarý qoldanyp, zardap shegýshiden 10 million teńge kóleminde aqshasyn tartyp alǵany anyqtaldy», - dedi Eńbekshiqazaq aýdany politsiia basqarmasynyń bastyǵy Jaqsylyq Altynbaev.
Zardap shegýshi kúdiktiden Toyota Camry-70 avtokóligin satyp almaq bolǵan. Kezdesý jáne aqshany berý Esik qalasynda ótken. «Az ýaqyttyń ishinde qyzmetkerler er adamdy anyqtap, ustady. Ony zardap shegýshi men kýáger tanydy. Ol – 22 jastaǵy Esik qalasynyń turǵyny bolyp shyqty. Qazirgi kezde oǵan qatysty QR Qylmystyq kodeksiniń 192-baby, 4-bóligi, 1-tarmaǵy boiynsha is qozǵaldy. Kúdikti jasaǵan qylmysyn moiyndady. Qazirgi kezde ýaqytsha ustaý izoliatoryna qamalǵan», - dedi Jaqsylyq Altynbaev.
