Almaty qalasynyń ákimi Darhan Satybaldy Naýryzbai aýdanyn jumys sapary barysynda aralap, «Almaty Tazalyq» MKK-niń jańartylǵan óndiristik bazasyna bardy. Shahar basshysy arnaiy tehnikalardy qarap, qyzmetkerlerdiń eńbek jaǵdaiymen tanysyp, kásiporyn ujymymen kezdesti.
Aýmaǵy 2 gektar bolatyn óndiristik baza Baisultanov kóshesinde ornalasqan. Munda 352 adam eńbek etedi jáne 66 arnaiy tehnika, onyń ishinde jolǵa qyzmet kórsetetin 14 ámbebap mashina bar.
Kásiporyn aýmaǵynda 12,5 myń sharshy metr asfaltbeton jabyny tóselip, kóktaiǵaqqa qarsy materialdardy saqtaýǵa arnalǵan alań jabdyqtaldy. Sondai-aq kógaldandyrý jumystary júrgizilip, bazanyń infraqurylymy jańartyldy.
Foto: Almaty qalasy ákimdiginiń baspasóz qyzmeti
Qyzmetkerlermen kezdesýde Darhan Satybaldy kommýnaldyq qyzmetterdiń sapaly jumysy jumysshylardyń eńbek jaǵdaiyna tikelei bailanysty ekenin atap ótti.
«Qyzmetkerlerge laiyqty eńbek jaǵdaiyn jasaýymyz kerek. Qajetti jaǵdai jasalmasa, jumysty sapaly oryndaýdy qalai talap etemiz? Eń aldymen, qalamyzdyń tazalyǵyn kún saiyn qamtamasyz etip júrgen adamdardyń eńbegin qurmetteýimiz qajet», – dedi qala ákimi.
Kezdesý barysynda qala kóshelerin kútip ustaý, tazalyq jumystaryn uiymdastyrý jáne kommýnaldyq qyzmet kórsetý sapasyna erekshe nazar aýdaryldy.
«Tazalyq birinshi orynda turýy kerek. Tazalyq, tártip pen kórkeitý qalanyń jalpy kelbetin qalyptastyrady. Basqa elge nemese qalaǵa barǵanda, eń aldymen, onyń qanshalyqty taza ekenine nazar aýdaramyz. Bul qorshaǵan ortany qalai qabyldaitynymyzǵa jáne oǵan degen kózqarasymyzǵa áser etedi. Tazalyq joq jerde tártip te bolmaidy. Sondyqtan bul jumys turaqty ári júieli túrde júrgizilýi kerek», – dedi Darhan Satybaldy.
Qala ákimi Memleket basshysy Almatyny retke keltirý mindetin qoiǵanyn da jetkizdi. Osyǵan bailanysty qalany kórkeitý jáne tazalyq saqtaý jumystary jalǵasady. Al kommýnaldyq qyzmetter bul mindetterdiń júieli ári sapaly oryndalýyn qamtamasyz etýge tiis.
Qazirgi tańda «Almaty Tazalyq» kásipornynyń avtoparkinde 1 017 tehnika bar. Qysqy tazalyq jumystaryna 830 tehnika qarastyrylǵan. Onyń ishinde jyl boiy paidalanylatyn 700 mashina jáne qysqy jumystarǵa arnalǵan 130 arnaiy tehnika bar. Al qalǵan 187 tehnika jaz mezgilinde qoldanylady.
Biyl kásiporyn qosymsha 200 arnaiy tehnika satyp alyp jatyr. Sonyń nátijesinde avtopark quramyndaǵy tehnikanyń jalpy sany 1 217-ge jetedi.
Foto: Almaty qalasy ákimdiginiń baspasóz qyzmeti
Foto: Almaty qalasy ákimdiginiń baspasóz qyzmeti
