Vladimir Pýtinniń úlken qyzy Mariia Vorontsovaǵa tiesili delingen "Nameko" meditsinalyq kompaniiasy 2020 jyly 839 mln rýbl (shamamen 11 mln dollar) tabys tapqan. Kompaniia byltyr 21,4 mln rýblǵa (shamamen 272 myń dollar) taýar satyp, qyzmet kórsetken. Osylaisha "Nomeko" kompaniiasynyń jyldyq tabysy – 3822 paiyzdy quraǵan.
"SPARK-Interfaks" málimetinshe, salyq tólegennen keiin kompaniianyń taza tabysy 600 mln rýblge (shamamen 7,7 mln dollar) jetken.
Máskeý memlekettik ýniversitetiniń túlegi, meditsina ǵylymynyń kandidaty Mariia Vorontsova Resei prezidentiniń qyzy ekenin osyǵan deiin The New Times, Bi-bi-si-diń Orys qyzmeti, Bloomberg agenttikteri habarlaǵan.
2014 jylǵa deiin Vorontsova Balalar endokrinologiia institýtynyń ordinatýrasynan ótken. Keiinirek "Nomeko" meditsinalyq kompaniiasynyń aktsionerine ainalǵan. 2019 jyly Bi-bi-si-diń Orys qyzmeti atalǵan kompaniianyń "Sogaz meditsina" klinikalar tobymen birigip, Leningrad oblysynda meditsinalyq keshen salýmen ainalysyp jatqanyn habarlaǵan. Sol kezde keshen "jabdyqtalýy jaǵynan álemdegi alǵashqy úsh jetekshi klinikanyń qataryna kirýi tiis" dep habarlandy. Jobanyń quny 40 mlrd rýblge baǵalanǵan.
