Resei prezidentiniń baspasóz hatshysy Dmitrii Peskov syrtqy ister ministri Sergei Lavrovtyń Amerika saiasatyna qatysty "topas" sózin paidalanýyna qalai qaraisyz degen suraqqa "Lavrovqa kez kelgen leksikonmen sóileýge ruqsat berilgen" dep jaýap berdi.
Peskovtyń pikirinshe, Lavrov málimdemesi – AQSh-tyń Reseige qatysty "agressiiashyl" saiasatyna laiyq jaýap bolyp shyqqan. "Ministr ádettegidei dóp tústi" dedi Peskov.
Aqparat quraldarynyń jazýynsha, Resei SIM buryn da túrli leksikonmen sóilep, kózge túsken. Basylymdar onyń buryn AQSh-taǵy sailaýaldy kampaniiasyn aitqanda "pýss" (kóbik) sózin paidalanǵanyn, túrli sheneýnikter men joǵary laýazymdy tulǵalarǵa qarata "esýas" (debil), "jyndy" (dolbanyi psih), "aýrý" (bolnye) siiaqty sózderdi paidalanǵanyn eske salady.
8 sáýir kúngi Qazaqstanǵa sapary barysynda Lavrov AQSh-ty senimsiz odaqtas dep atap, onyń Reseige saiasatyn synaǵan.
"Biz tek ózimizge ǵana senýimiz kerek, sebebi AQSh ta, olardyń odaqtastary da senimdi serik emes. Memleket úshin mańyzdy sátterde biz olarǵa iek arta almaimyz" dedi Lavrov.
Qazaqstannyń resmi organdarynyń saittary Lavrovtyń batysqa qarsy málimdemeleri týraly jazbady.
Qazaqstan SIM saitynda jariialanǵan aqparat boiynsha, eki eldiń Syrtqy ister ministrleri saiasat, ekonomika, áskeri tehnika, kólik tranziti, energetika salalary men halyqaralyq uiymdar, aimaqtyq integratsiialyq birlestikter aiasyndaǵy yntymaqtastyǵyn talqylaǵan.
