Resei prezidenti Vladimir Pýtin beisenbi kúni Máskeýdiń Ýkrainadaǵy jaǵdaidy retteý jóninde kelissóz júrgizýge daiyn ekenin málimdedi. Onyń aitýynsha, Resei Ýkrainamen soǵysqysy kelmeidi.
«Biz Ýkrainamen soǵysqymyz kelmeidi. Biraq eger qazirgi ýkrain basshylyǵy soǵysqysy kelse, soǵysa bersin», — dedi Pýtin VGTRK tilshisi Pavel Zarýbinge.
Pýtinniń sózinshe, osy aptada AQSh ókilderimen ótken kelissózder barysynda úshjaqty bailanystardy qaita jandandyrý týraly ýaǵdalastyqqa qol jetkizilgen.
Onyń aitýynsha, kelissózderde beibit kelisim jasalǵannan keiin Ýkraina men Reseidiń qaýipsizdigin qamtamasyz etý máselesi talqylanbaq.
Pýtin ýaqytsha bitimge qarsy ekenin taǵy da ańǵartty. Ol soǵys qimyldaryn qysqa merzimge toqtatýmen shektelmei, túpkilikti kelisimge qol jetkizý qajet ekenin aitty.
Sondai-aq Resei basshysy Ýkrainanyń shyǵysyndaǵy Máskeý basyp alǵan ári ózine tiesili dep sanaityn aýmaqtardy «tarihi Resei jeri» dep atady.
«Meniń bul máselege kózqarasym boiynsha, ol jerler olardyń aýmaǵy emes. Bul — tarihi Reseidiń jeri. Sondyqtan qandai da bir aýmaqtyq shyǵyndar týraly aitý orynsyz dep oilaimyn», — dedi Pýtin.
