Qazaqstan Ishki ister ministrliginiń tekserýinen keiin 21 jastaǵy Abylai Dúisenovtiń ólimine qatysty buryn toqtatylǵan qylmystyq is qaita tergele bastady. Alaida marqumnyń otbasy tergeý barysyna narazy ekenin aityp, onyń ólimine qatysty barlyq mán-jaidy anyqtaýdy talap etip otyr, dep habarlaidy ult.kz Stan.kz-ke silteme jasap.
Marqumnyń anasy Aisulýdyń aitýynsha, tergeý kezinde birqatar mańyzdy jait eskerýsiz qalǵan. Onyń sózinshe, ulynyń hat almasýlarynan Abylaidyń Sanjar Muqashtan bólek, «Vampir» laqap atymen tanylǵan adamnan da qaryz alǵany belgili bolǵan. Keiin onyń Altynbek esimdi adam ekenin anyqtaǵan. Alaida áieldiń aitýynsha, odan jaýap alynbaǵan.
Aisulý tergeý Sanjar Muqashtyń múddesine sai júrgizilip jatyr dep esepteidi. Onyń málimdeýinshe, ulynyń telefony tolyq zerttelmegen, otbasy múshelerinen jaýap alynbaǵan, al keibir saraptamalar tek Sanjar men basqa adamdardyń kórsetilimderine negizdelgen.
Marqumnyń týystary Abylaidyń ólimine qatysty ózge de nusqalar tekserilýi kerek dep sanaidy. Olardyń aitýynsha, advokattar keshendi saraptama taǵaiyndaýǵa qol jetkizgenimen, mamandarǵa qylmystyq istiń materialdary tolyq usynylmaǵan. Soǵan qaramastan, sot-meditsinalyq sarapshylar oqiǵany ózine qol jumsaý dep baǵalaýǵa bolmaitynyn kórsetken qorytyndy jasaǵan. Alaida keiin tergeý toqtatylǵan.
Aisulýdyń qorǵaýshylary tergeý barysynda kúdikti bolýy múmkin adamdardyń geolokatsiia derekteri de suratylmaǵanyn aitady. Sonymen qatar tergeýshiniń áreketterine qatysty birneshe ret shaǵym túsirilip, onyń keibir áreketteri zańsyz dep tanylǵanyn málimdedi.
Is materialdarynda qaryzǵa qatysty hat almasýlar bar.
Aisulýdyń redaktsiiaǵa usynǵan qujattaryna sáikes, Abylai men Sanjardyń hattarynda paiyzben berilgen iri kólemdegi aqsha týraly jazylǵan. Áńgimede bastapqyda 140–165 myń dollar týraly aitylsa, keiin soma 65–75 million teńgege deiin ózgergen. Sondai-aq Abylai qaitys bolardan az ýaqyt buryn Sanjarǵa bank qosymshasy arqyly 1 million 80 myń teńge aýdarǵan. Áieldiń aitýynsha, bul tamyz aiyndaǵy qaryzdyń alǵashqy ailyq paiyzy bolǵan.
Marqumnyń otbasy men Sanjar Muqash arasyndaǵy daý páterge de qatysty. Aisulýdyń sózinshe, Sanjar otbasyny turǵyn úiden shyǵarýǵa tyrysyp keledi.
Birinshi satydaǵy sot Muqashtyń talabyn qanaǵattandyrǵanymen, Almaty qalalyq sotynyń apelliatsiialyq alqasy páterdi satý-satyp alý shartyn jaramsyz dep tanyǵan. Keiin kassatsiialyq sot isti qaita qaraýǵa jibergen. Alaida sot protsesi áli bastalmaǵan.
Aisulýdyń azamattyq is boiynsha advokaty Gúlmira Sydyqovanyń aitýynsha, Abylai men Sanjardyń hat almasýlarynda páterdi satý nemese basqa adamnyń atyna rásimdeý týraly kelisim joq. Onyń pikirinshe, sot qaryzǵa berilgen aqshanyń qaidan alynǵanyn da anyqtaýy qajet.
Qorǵaýshylardyń málimdeýinshe, qylmystyq is boiynsha túpkilikti sheshim áli qabyldanbaǵan. Olar tergeý tolyq ári jan-jaqty júrgizilmegen dep esepteidi.
Aita keteiik, kompozitor Arman Dúisenov 2023 jylǵy qańtarda qaitys bolǵan. Al 2024 jylǵy qazanda onyń uly Abylai Dúisenov te dúnieden ozǵan edi.
