قازاقستان ٸشكٸ ٸستەر مينيسترلٸگٸنٸڭ تەكسەرۋٸنەن كەيٸن 21 جاستاعى ابىلاي دٷيسەنوۆتٸڭ ٶلٸمٸنە قاتىستى بۇرىن توقتاتىلعان قىلمىستىق ٸس قايتا تەرگەلە باستادى. الايدا مارقۇمنىڭ وتباسى تەرگەۋ بارىسىنا نارازى ەكەنٸن ايتىپ, ونىڭ ٶلٸمٸنە قاتىستى بارلىق مەن-جايدى انىقتاۋدى تالاپ ەتٸپ وتىر, دەپ حابارلايدى ult.kz Stan.kz-كە سٸلتەمە جاساپ.
مارقۇمنىڭ اناسى ايسۇلۋدىڭ ايتۋىنشا, تەرگەۋ كەزٸندە بٸرقاتار ماڭىزدى جايت ەسكەرۋسٸز قالعان. ونىڭ سٶزٸنشە, ۇلىنىڭ حات الماسۋلارىنان ابىلايدىڭ سانجار مۇقاشتان بٶلەك, «ۆامپير» لاقاپ اتىمەن تانىلعان ادامنان دا قارىز العانى بەلگٸلٸ بولعان. كەيٸن ونىڭ التىنبەك ەسٸمدٸ ادام ەكەنٸن انىقتاعان. الايدا ەيەلدٸڭ ايتۋىنشا, ودان جاۋاپ الىنباعان.
ايسۇلۋ تەرگەۋ سانجار مۇقاشتىڭ مٷددەسٸنە ساي جٷرگٸزٸلٸپ جاتىر دەپ ەسەپتەيدٸ. ونىڭ مەلٸمدەۋٸنشە, ۇلىنىڭ تەلەفونى تولىق زەرتتەلمەگەن, وتباسى مٷشەلەرٸنەن جاۋاپ الىنباعان, ال كەيبٸر ساراپتامالار تەك سانجار مەن باسقا ادامداردىڭ كٶرسەتٸلٸمدەرٸنە نەگٸزدەلگەن.
مارقۇمنىڭ تۋىستارى ابىلايدىڭ ٶلٸمٸنە قاتىستى ٶزگە دە نۇسقالار تەكسەرٸلۋٸ كەرەك دەپ سانايدى. ولاردىڭ ايتۋىنشا, ادۆوكاتتار كەشەندٸ ساراپتاما تاعايىنداۋعا قول جەتكٸزگەنٸمەن, ماماندارعا قىلمىستىق ٸستٸڭ ماتەريالدارى تولىق ۇسىنىلماعان. سوعان قاراماستان, سوت-مەديتسينالىق ساراپشىلار وقيعانى ٶزٸنە قول جۇمساۋ دەپ باعالاۋعا بولمايتىنىن كٶرسەتكەن قورىتىندى جاساعان. الايدا كەيٸن تەرگەۋ توقتاتىلعان.
ايسۇلۋدىڭ قورعاۋشىلارى تەرگەۋ بارىسىندا كٷدٸكتٸ بولۋى مٷمكٸن ادامداردىڭ گەولوكاتسييا دەرەكتەرٸ دە سۇراتىلماعانىن ايتادى. سونىمەن قاتار تەرگەۋشٸنٸڭ ەرەكەتتەرٸنە قاتىستى بٸرنەشە رەت شاعىم تٷسٸرٸلٸپ, ونىڭ كەيبٸر ەرەكەتتەرٸ زاڭسىز دەپ تانىلعانىن مەلٸمدەدٸ.
ٸس ماتەريالدارىندا قارىزعا قاتىستى حات الماسۋلار بار.
ايسۇلۋدىڭ رەداكتسيياعا ۇسىنعان قۇجاتتارىنا سەيكەس, ابىلاي مەن سانجاردىڭ حاتتارىندا پايىزبەن بەرٸلگەن ٸرٸ كٶلەمدەگٸ اقشا تۋرالى جازىلعان. ەڭگٸمەدە باستاپقىدا 140–165 مىڭ دوللار تۋرالى ايتىلسا, كەيٸن سوما 65–75 ميلليون تەڭگەگە دەيٸن ٶزگەرگەن. سونداي-اق ابىلاي قايتىس بولاردان از ۋاقىت بۇرىن سانجارعا بانك قوسىمشاسى ارقىلى 1 ميلليون 80 مىڭ تەڭگە اۋدارعان. ەيەلدٸڭ ايتۋىنشا, بۇل تامىز ايىنداعى قارىزدىڭ العاشقى ايلىق پايىزى بولعان.
مارقۇمنىڭ وتباسى مەن سانجار مۇقاش اراسىنداعى داۋ پەتەرگە دە قاتىستى. ايسۇلۋدىڭ سٶزٸنشە, سانجار وتباسىنى تۇرعىن ٷيدەن شىعارۋعا تىرىسىپ كەلەدٸ.
بٸرٸنشٸ ساتىداعى سوت مۇقاشتىڭ تالابىن قاناعاتتاندىرعانىمەن, الماتى قالالىق سوتىنىڭ اپەللياتسييالىق القاسى پەتەردٸ ساتۋ-ساتىپ الۋ شارتىن جارامسىز دەپ تانىعان. كەيٸن كاسساتسييالىق سوت ٸستٸ قايتا قاراۋعا جٸبەرگەن. الايدا سوت پروتسەسٸ ەلٸ باستالماعان.
ايسۇلۋدىڭ ازاماتتىق ٸس بويىنشا ادۆوكاتى گٷلميرا سىدىقوۆانىڭ ايتۋىنشا, ابىلاي مەن سانجاردىڭ حات الماسۋلارىندا پەتەردٸ ساتۋ نەمەسە باسقا ادامنىڭ اتىنا رەسٸمدەۋ تۋرالى كەلٸسٸم جوق. ونىڭ پٸكٸرٸنشە, سوت قارىزعا بەرٸلگەن اقشانىڭ قايدان الىنعانىن دا انىقتاۋى قاجەت.
قورعاۋشىلاردىڭ مەلٸمدەۋٸنشە, قىلمىستىق ٸس بويىنشا تٷپكٸلٸكتٸ شەشٸم ەلٸ قابىلدانباعان. ولار تەرگەۋ تولىق ەرٸ جان-جاقتى جٷرگٸزٸلمەگەن دەپ ەسەپتەيدٸ.
ايتا كەتەيٸك, كومپوزيتور ارمان دٷيسەنوۆ 2023 جىلعى قاڭتاردا قايتىس بولعان. ال 2024 جىلعى قازاندا ونىڭ ۇلى ابىلاي دٷيسەنوۆ تە دٷنيەدەن وزعان ەدٸ.
