Belgiia astanasy Briýsseldegi áigili «Siip turǵan bala» (Manneken-Pis) músini Qazaqstannyń ulttyq shapanymen bezendirildi. Erekshe kiim kigen eskertkishti kórýge júzdegen týrist pen qala turǵyny jinaldy, dep habarlaidy ult.kz NewTimes.kz-ke silteme jasap.
Is-shara Qazaqstan Respýblikasynyń kúnine orai uiymdastyryldy. Elshilik málimetinshe, Manneken-Pis músinine qazaqy shapan úshinshi ret kigizilip otyr. Buǵan deiin músin 2021 jyldyń jazynda jáne byltyr qazan aiynda ulttyq kiimmen bezendirilgen.
Elshilik ókilderi bul dástúr Qazaqstan men Belgiia arasyndaǵy dostyq pen mádeni bailanystyń jarqyn simvolyna ainalǵanyn atap ótti. Músindi qazaqy shapanmen 21 qazanda Briýsseldiń tarihi ortalyǵynan kórýge múmkindik boldy.
Músinniń kiimder toptamasynda myńnan astam úlgi bar
Manneken-Pis músinin túrli kiimmen bezendirý dástúri úsh ǵasyrdan astam ýaqyttan beri jalǵasyp keledi. Músinge alǵashqy kiim 1698 jyly syiǵa tartylǵan.
Qazir onyń kiimder toptamasynda álemniń ártúrli elderinen jinalǵan myńnan astam kiim úlgisi bar. Músinniń kiimin aýystyrý saltanatty rásimmen jáne úrmeli aspaptar orkestriniń súiemeldeýimen ótedi.
Áigili músin Briýsseldiń tarihi ortalyǵynda, Rue de l'Étuve jáne Rue du Chêne kósheleriniń qiylysynda, Gran-Plas alańyna jaqyn jerde ornalasqan.
