Ońtústik Koreia prezidenti Li Chje Mioń azamattardy qiyndyqqa tap bolǵan jaǵdaida ómirden bas tartpai, psihologiialyq kómekke júginýge shaqyrdy. Bul týraly ol X áleýmettik jelisinde sýitsid kórsetkishiniń tómendeýine qatysty pikir bildirip, jazba jariialady, dep habarlaidy ult.kz.
«Ómir súrý kerek. Ne bolsa da, ómir súrýdi jalǵastyrýǵa tiissizder», – dep jazdy prezident. Sondai-aq ol mamandar qiyn jaǵdaidan shyǵýdyń jolyn tabýǵa kómektesetinin atap ótti.
Resmi statistikaǵa sáikes, 2025 jyly Ońtústik Koreiada sýitsid saldarynan 14 144 adam qaitys bolǵan. Ár 100 myń turǵynǵa shaqqandaǵy kórsetkish 2024 jylǵy 29,1-den 2025 jyly 27,8 jaǵdaiǵa deiin tómendegen. Soǵan qaramastan, el Ekonomikalyq yntymaqtastyq jáne damý uiymyna (EYDU) múshe memleketter arasynda sýitsid deńgeii eń joǵary el bolyp qalyp otyr.
2026 jyldyń qańtar-shilde ailarynda sýitsid saldarynan qaitys bolǵandar sany ótken jyldyń sáikes kezeńimen salystyrǵanda 12,3%-ǵa azaiǵan. Atap aitqanda, kórsetkish 8475-ten 7432 jaǵdaiǵa deiin tómendegen. Bilik ókilderi ekonomikalyq qiyndyqtarǵa bailanysty sýitsid jaǵdailarynyń azaiǵanyn atap ótken. Alaida jastar arasyndaǵy jaǵdai áli de kúrdeli.
13 qazanda Li Chje Mioń úkimet otyrysynda jastar arasyndaǵy sýitsid deńgeiiniń ósýi jalǵasyp jatqanyn málimdedi. Prezident munyń yqtimal sebepteri retinde shamadan tys básekelestikti, oqý júktemesin jáne mektepterdegi býllingti atady. Ol sýitsidtiń aldyn alýǵa baǵyttalǵan jańa sharalar ázirleýdi tapsyrdy.
Al 12 qazanda Ońtústik Koreia úkimeti 2030 jylǵa deiingi sýitsidtiń aldyn alý baǵdarlamasyn bekitti. Qujat psihologiialyq kómekti keńeitýdi, qaryzǵa batqan, kedeilikke ushyraǵan jáne qoǵamnan oqshaýlanǵan azamattardy qoldaýdy kózdeidi.
Bilik ár 100 myń turǵynǵa shaqqandaǵy sýitsid kórsetkishin 18,9 jaǵdaiǵa deiin tómendetýdi josparlap otyr.
