Resei Prezidenti Vladimir Pýtin Astanadaǵy kezdesýde óziniń túrkiialyq áriptesi Taiip Erdoǵanǵa Túrkiiada gaz habyn qurý ideiasy týraly aitty, dep habarlaidy Sputnik Qazaqstan.
"Keshe (reseilik) energetikalyq aptada energetika ministri jáne Botas kompaniiasynyń basshysymen bolǵan konsýltatsiialardan keiin "Gazprommen" kelistik, men bul týraly kópshilik aldynda aittym: eger Túrkiia jáne basqa elderdegi satyp alýshylarymyz qyzyǵýshylyq tanytsa, taǵy bir gaz qubyry júiesin salyp, basqa elderge satý úshin Túrkiia aýmaǵynda gaz habyn qurýdy qarastyrýǵa bolady. Eń aldymen, árine, eýropalyqtarǵa", - dedi Pýtin.
Ol buǵan deiin Resei gaz tranzitin "Soltústik aǵynnan" Qara teńiz aimaǵyna jáne Túrkiiaǵa aýystyra alatynyn aitqan bolatyn. Túrkiianyń energetika jáne tabiǵi resýrstar ministri Fatih Donmez onyń tehnikalyq turǵydan múmkin ekenin jáne muqiiat zerdeleýdi qajet etetinin aitty.
Vladimir Pýtin Rejep Erdoǵanmen kezdesýde jańa gaz habyn qurý múmkindigi týraly aita otyryp, onyń qurylýy energiia baǵasyn "eshqandai saiasi reńksiz" retteýge jol ashatynyna toqtaldy.
"Biz (baǵalardy) qalypty, naryqtyq deńgeide, eshqandai saiasi reńksiz tynysh rettei alamyz", - degen Pýtin qazirgi baǵanyń sharyqtap turǵanyn nazarǵa aldy.
"Biz habty birge qurǵan jaǵdaida, ol tek jetkizý alańy ǵana emes, sonymen qatar baǵany anyqtaý alańy da bolar edi. Óitkeni baǵa máselesi óte mańyzdy. Búgin baǵa aspandap tur", - dedi RF Prezidenti.
