PTR-test anyqtamasy joq shetel azamatyn bortqa kirgizgen áýe kompaniiasyna 1600 AEK aiyppul salynady. Bul týraly Kóliktegi bas memlekettik sanitarlyq dáriger Sádýaqas Baiǵabylov málim etti, dep habarlaidy QazAqparat.
Eske sala ketsek búgin QR Úkimetiniń baspasóz qyzmeti vedomstvoaralyq komissiianyń áýe kompaniialaryna PTR testi nátijesi týraly anyqtamasy joq jolaýshylardy ushaqqa otyrǵyzýǵa tyiym salý týraly sheshimin túsindirgen bolatyn. Bul talap tek sheteldik azamattarǵa qatysty. Shetelde júrgen QR azamattarynyń áýe reisterimen PTR testileýden ótkeni týraly anyqtamasynsyz otanyna oralýǵa quqyǵy bar. Mundai jaǵdaida Qazaqstanǵa kelgennen keiin qazaqstandyqtar PTR testileý nátijesin alǵanǵa deiin karantinge ornalastyrylatyn bolady. QR óńirleri arasyndaǵy ishki áýe reisteriniń ushaǵyna otyrǵyzý kezinde PTR test nátijesi týraly anyqtama talap etilmeidi.
OKQ-da ótken baspasóz máslihatynda Kóliktegi bas memlekettik sanitarlyq dáriger Sádýaqas Baiǵabylov bul aqparatty rastai otyryp, shetelde júrgen otandastarymyzǵa elge kelerde mindetti túrde PTR testiden ótý kerektigin eskertti.
«Búgingi alys bolsyn, jaqyn bolsyn shetelde júrgen otandastarymyzǵa PTR testiden ótýdiń qiyndyǵy joq. Sebebi halyqaralyq áýejailarda, qalalar men otelderde test tapsyratyn pýnkt bar. Analiz qorytyndysy bir táýliktiń ishinde belgili bolady. Bizdiń monitoring kórsetip otyrǵandai, eki kúndik karantinge jatqyzylatyn otandastarymyzdyń kóbi demalystan keledi. Kóbi Túrkiia men Arab Ámirlikterinen oralady. Al jumys saparymen barǵan otandastarymyz ben stýdentterimiz PTR anyqtamamen oralýda», - dedi Sádýaqas Baiǵabylov.
Ol sonymen qatar 27 qazannan bastap PTR test anyqtamasynsyz keletin sheteldikter elge kirgizilmeitinin eskertti.
«Al bortqa PTR anyqtamasy joq sheteldikterdi kirgizgen áýe kompaniialary ákimshilik jaýapkershilik qarastyrylǵan. Áýe kompaniialarynyń mundai quqyqbuzýshylyǵy úshin 1600 AEK kóleminde aiyppul salynady», - dedi ol.
