Qazaqstan prezidenti Qasym-Jomart Toqaevtyń áleýmettik jelide resmi tirkelgen eki paraqshasy ǵana bar, dep habarlady memleket basshysynyń baspasóz hatshysy Berik Ýáli.
Onyń aitýynsha, sońǵy kezderi ártúrli áleýmettik jelilerde memleket basshynyń atynan ashylǵan jalǵan paraqshalar kóbeiip ketti. Sol arqyly bireýler jalǵan málimet taratady, al taǵy bireýler kommertsiialyq maqsatta paidalandy eken.
Sol sebepti prezidenttiń baspasóz hatshysy barsha áleýmettik media qoldanýshy men BAQ ókilderine eskertý jasady.
"Qazaqstan prezidenti Qasym-Jomart Toqaevtyń atyna resmi tirkelgen eki akkaýnt qana bar. Olar: Twitter jelisinde 2011 jyldan beri jumys istep kele jatqan - @TokayevKZ, sondai-aq, 2019 jyldyń sáýir aiynda Instagram jelisinde ashylǵan @tokayev_online akkaýnty", - dep jazdy Berik Ýáli.
Sóz sońynda ol áleýmettik jeli qoldanýshylarynan prezident týraly naqty rastalǵan aqparat alý úshin atalǵan resmi paraqshalarǵa ǵana júginýdi surady.
