Memleket tarapynan kepildik beriletin nesie mólsheri 360 mln teńgeden 1 mlrd teńgege deiin ulǵaityldy. Bul týraly QR Ulttyq ekonomika ministrliginiń kásipkerlikti damytý departamentiniń direktory Shyńǵys Ahmetov málim etti, dep habarlaidy QazAqparat.
«Biznestiń jol kartasy – 2025» baǵdarlamasy sheńberinde sońǵy qaryz alýshy úshin nesie quny banktiń syiaqy mólsherlemesin sýbsidiialaýmen eseptegende 6 paiyzdy quraidy. Bir kásipkerdi nesielik qoldaý mólsheri 7 mlrd teńgege ulǵaidy. Buryn 2,5 mlrd teńge bolatyn. Ainalym qarajatyn qarjylai tolyqtyrý aiasy da aitarlyqtai keńeitildi. Qazir bul shaǵyn jáne orta biznes úshin eń mańyzdy qarajat bolyp sanalady. Baǵdarlama sheńberinde ainalym qarajaty 60 mln teńgeden 500 mln teńgege deiin ulǵaiyp otyr. Bul rette saýda qyzmeti sýbektileriniń ainalym qarajatyn tolyqtyrý – 100 mln teńgege deiin bolady», - dedi Shyńǵys Ahmetov OKQ-da onlain rejimde ótken baspasóz máslihatynda.
Departament direktory sonymen qatar kásipker nesie alý kezinde bankke júgingende onyń kepili jetkiliksiz bolǵan jaǵdai da kezdesetinin jetkizdi.
«Bul óte úlken másele. Osy problemany sheshý maqsatynda memleket tarapynan kepildendirý beriletin nesieniń mólsheri 360 mln teńgeden 1 mlrd teńgege deiin ulǵaiyp otyr. Osyndai nesieniń memleket tarapynan beriletin kepildendirý mólsheri 50 paiyzdy quraidy. Al 360 mln teńgege deiin beriletin nesie boiynsha memlekettik kepildendirý 85 paiyzdy qurap otyr», - dedi ol.
Eske sala ketsek buǵan deiin Shyńǵys Ahmetov qazirgi kezeńde shaǵyn jáne orta biznesti memlekettik qoldaýdyń qandai tetikteri bar ekenin aityp bergen bolatyn.
