Memleket basshysy Esep komitetiniń tóraǵasy Natalia Godýnovany qabyldady, dep habarlaidy "Ult aqparat" Aqordaǵa silteme jasap.
Qasym-Jomart Toqaevqa ulttyq holdingter jumysynyń tiimdiligine júrgizilgen taldaý qorytyndylary týraly esep berildi. Mundai tapsyrma 2019 jylǵy 2 qyrkúiekte Prezidenttiń Qazaqstan halqyna arnalǵan Joldaýynda berilgen bolatyn.
Esep komiteti basshysynyń málimeti boiynsha, sheshilýi tiis qordalanǵan máseleler men kemshilikter anyqtalǵan. Atap aitqanda, ekonomikadaǵy kvazimemlekettik sektordyń úlesi azaimai tur. Ondaǵy kompaniialar respýblikalyq biýdjettiń qoldaýyna táýeldi.
Natalia Godýnovanyń aitýynsha, satyp alýlar kezindegi rásimderde áli de ashyqtyq joq. Sharttardyń deni básekelestik jolmen jasalmaidy. Esep komiteti aýdit júrgizip, osy máseleniń naqty sebepterin anyqtaýy kerek.
Esep komitetiniń basshysy Qazaqstan Prezidentiniń qaraýyna ulttyq holdingterdi, sonyń ishinde kvazimemlekettik sektordyń keibir kompaniialaryn jabý maqsatynda ońtailandyrý týraly usynys engizdi.
Jalpy, Prezident Esep komitetiniń jumysyna oń baǵa berdi.
