Prezident Qasym-Jomart Toqaev Premer-Ministr Asqar Mamin men Densaýlyq saqtaý ministri Aleksei Tsoidy qabyldady, dep habarlaidy Aqorda.
Memleket basshysyna elimizdegi sanitarlyq-epidemiologiialyq ahýal, halyqqa vaktsina salý barysy, respýblikanyń áleýmettik-ekonomikalyq damýynyń ózekti máseleleri jaiynda baiandaldy.
Qasym-Jomart Toqaevqa halyqqa ekpe egýge qatysty qabyldanyp jatqan sharalar jaiynda aityldy. Asqar Maminniń aitýynsha, sáýirden bastap ai saiyn 2 million adamǵa vaktsina salý josparlanyp otyr.
Prezidentke otandyq QAZVAC vaktsinasynyń óńirlerge jetkizilýi jaiynda aqparat berildi. Premer-Ministr Qazaqstannyń COVID-19 indetine qarsy vaktsina shyǵarǵan on memlekettiń jáne óz ázirlemelerin tirkegen bes eldiń qataryna kirgenin aitty. Sonymen qatar ol 26 sáýirden bastap «ASHYQ» qosymshasyn barlyq oblystar keń kólemde qoldanyla bastaitynyn atap ótti. Bul «qyzyl» jáne «sary» aimaq kezinde ekonomikanyń ártúrli sektorynyń qaýipsiz jumys isteýine múmkindik bermek.
Memleket basshysyna berilgen aqparattarǵa sáikes, juqpaly aýrýlar aýrýhanasyndaǵy oryndar 42 paiyzǵa, jan saqtaý bólimderi 28 paiyzǵa tolyq. Dári-dármektiń, jeke qorǵanys quraldarynyń qajetti qory jasaqtalǵan, PTR-zerthanalary kúnine 123 myń adamǵa deiin qyzmet kórsete alady. 25 myń tósek-oryn qory bar, barlyq óńirde zamanaýi quraldarmen jabdyqtalǵan jańa juqpaly aýrýlar aýrýhanalary jumys istep jatyr.
Asqar Mamin Qasym-Jomart Toqaevqa 29-30 sáýir kúnderi ótetin Eýraziialyq parlamentaralyq keńestiń otyrysyna daiyndyq barysyn baiandady. Sonymen qatar investitsiia tartý, halyqty jumyspen qamtý máseleleri de qarastyryldy.
Kezdesý sońynda Prezident Úkimetke otandyq vaktsina óndirisin arttyrýdy jáne onyń halyqqa qol jetimdi bolýyn erekshe baqylaýda ustaýdy tapsyrdy.
Eske sala ketsek, 22 sáýirde QR Premer-Ministriniń orynbasary Eraly Toǵjanov Biologiialyq qaýipsizdik problemalary ǵylymi-zertteý institýty bazasynda óndirilgen QazVac (QazCovid-in) qazaqstandyq vaktsinasynyń birinshi partiiasyn jóneltýge qatysqan bolatyn.
QazVac vaktsinasynyń alǵashqy 50 myń dozasy «SQ-Farmatsiianyń» habtaryna taratylyp, odan ári elimizdiń barlyq óńirlerindegi densaýlyq saqtaý basqarmalarynyń qoimalaryna jetkiziletin bolady. Aǵymdaǵy jylǵy 26 sáýirde halyqty QazVac vaktsinasymen vaktsinatsiialaý bastalady. Mamyr aiynda 50 myń doza kólemindegi vaktsinanyń kezekti partiiasyn shyǵarý josparlanýda. Budan ári vaktsina óndirisi kezeń-kezeńmen aiyna 500-600 myń dozaǵa deiin ulǵaitylatyn bolady.
