Foto: facebook.com/UA.KyivPolice
Qazaqstan Prezidenti Qasym-Jomart Toqaev Kievte bolǵan qazaqstandyq jýrnalistke jasalǵan shabýyl týraly pikir bildirdi, dep habarlaidy "Ult Aqparat".
Memleket basshysy bizdiń memlekettik organdar tergeýge qosylýǵa daiyn ekenin atap ótti.
"Qazaqstanda zań ústemdigin nyǵaitýǵa baǵyt alyndy. Meniń printsipti ustanymymdy bilesizder: elde zań men tártip bolýy kerek. Bizdiń qoǵamdaǵy barlyq qaqtyǵystar, kelispeýshilikter negizgi halyqaralyq normalarǵa sáikes qoldanystaǵy zańnama negizinde tek quqyq aiasynda sheshilýi kerek. Dál osy turǵydan alǵanda, keshe Kievte Qazaqstan azamaty Aidos Sadyqovqa qatysty bolǵan qylmysty qarastyrý qajet.
Men diplomatiialyq vedomstvo men quqyq qorǵaý organdary arqyly osy aýyr oqiǵa boiynsha Ýkraina tarapyna resmi suraý salýdy tapsyrdym. Qajet bolǵan jaǵdaida qazaqstandyq resmi organdar shyndyqty anyqtaýǵa járdemdesý úshin tergeýge qosylýǵa daiyn", - dep atap ótti ol.
18 maýsymda BAQ ókilderi Ýkraina astanasy Kiev qalasynda Qazaqstan azamaty Aidos Sadyqovqa qastandyq jasalǵanyn habarlady. Ýkraina Ulttyq politsiiasynyń habarlaýynsha, kúieýi men áieli otyrǵan Iarmola kóshesindegi kólikke belgisiz adam kelip, er adamdy atyp, jaraqattap, artynsha izin sýytqan. Áiel jaraqat alǵan joq.
Jábirlenýshi meditsinalyq mekemege jatqyzyldy.
Kiev politsiiasy "kisi óltirýge oqtalý" faktisi boiynsha qylmystyq is qozǵady.
