فوتو: facebook.com/UA.KyivPolice
قازاقستان پرەزيدەنتٸ قاسىم-جومارت توقاەۆ كيەۆتە بولعان قازاقستاندىق جۋرناليستكە جاسالعان شابۋىل تۋرالى پٸكٸر بٸلدٸردٸ, دەپ حابارلايدى "ۇلت اقپارات".
مەملەكەت باسشىسى بٸزدٸڭ مەملەكەتتٸك ورگاندار تەرگەۋگە قوسىلۋعا دايىن ەكەنٸن اتاپ ٶتتٸ.
"قازاقستاندا زاڭ ٷستەمدٸگٸن نىعايتۋعا باعىت الىندى. مەنٸڭ پرينتسيپتٸ ۇستانىمىمدى بٸلەسٸزدەر: ەلدە زاڭ مەن تەرتٸپ بولۋى كەرەك. بٸزدٸڭ قوعامداعى بارلىق قاقتىعىستار, كەلٸسپەۋشٸلٸكتەر نەگٸزگٸ حالىقارالىق نورمالارعا سەيكەس قولدانىستاعى زاڭناما نەگٸزٸندە تەك قۇقىق اياسىندا شەشٸلۋٸ كەرەك. دەل وسى تۇرعىدان العاندا, كەشە كيەۆتە قازاقستان ازاماتى ايدوس سادىقوۆقا قاتىستى بولعان قىلمىستى قاراستىرۋ قاجەت.
مەن ديپلوماتييالىق ۆەدومستۆو مەن قۇقىق قورعاۋ ورگاندارى ارقىلى وسى اۋىر وقيعا بويىنشا ۋكراينا تاراپىنا رەسمي سۇراۋ سالۋدى تاپسىردىم. قاجەت بولعان جاعدايدا قازاقستاندىق رەسمي ورگاندار شىندىقتى انىقتاۋعا جەردەمدەسۋ ٷشٸن تەرگەۋگە قوسىلۋعا دايىن", - دەپ اتاپ ٶتتٸ ول.
18 ماۋسىمدا باق ٶكٸلدەرٸ ۋكراينا استاناسى كيەۆ قالاسىندا قازاقستان ازاماتى ايدوس سادىقوۆقا قاستاندىق جاسالعانىن حابارلادى. ۋكراينا ۇلتتىق پوليتسيياسىنىڭ حابارلاۋىنشا, كٷيەۋٸ مەن ەيەلٸ وتىرعان يارمولا كٶشەسٸندەگٸ كٶلٸككە بەلگٸسٸز ادام كەلٸپ, ەر ادامدى اتىپ, جاراقاتتاپ, ارتىنشا ٸزٸن سۋىتقان. ەيەل جاراقات العان جوق.
جەبٸرلەنۋشٸ مەديتسينالىق مەكەمەگە جاتقىزىلدى.
كيەۆ پوليتسيياسى "كٸسٸ ٶلتٸرۋگە وقتالۋ" فاكتٸسٸ بويىنشا قىلمىستىق ٸس قوزعادى.
