Qazaqstanda sheteldik jumyskerlerdi tartýǵa arnalǵan kvota 40 paiyzǵa qysqartyldy, dep habarlaidy "Ult aqparat" QR Premer-Ministriniń baspasóz qyzmetine silteme jasap.
Qazaqstanda eńbek qyzmetin júzege asyrý úshin jumys berýshilerge sheteldik jumys kúshin tartýǵa berilgen ruqsattyń shekti sany 2020 jylǵa respýblikadaǵy jumys kúshiniń sanyna qatysty 29 292 birlikti nemese 0,32%-dy qurady.
«Kvota 2019 jyly bekitilgen sanymen (48 700) salystyrǵanda 40 paiyzǵa, onyń ishinde 3 sanat boiynsha (mamandar) – 3 paiyzǵa jáne 4 sanat boiynsha (bilikti jumysshylar) – 23 paiyzǵa qysqartyldy. Aqtóbe, Batys Qazaqstan, Qyzylorda jáne Soltústik Qazaqstan oblystary 4 sanat boiynsha sheteldik jumyskerlerdi tartýdan tolyqtai bas tartyp, jumys berýshilerdiń qajettiligin jergilikti mamandar esebinen jabýdy josparlap otyr», delingen habarlamada.
Kvotany qabyldaý ishki eńbek naryǵyn bilikti emes sheteldik jumys kúshinen qorǵaýǵa, qazaqstandyq kadrlardy kóbirek jumysqa ornalastyrýǵa múmkindik beredi, sondai-aq jumys berýshilerdiń bilikti sheteldik jumys kúshine degen suranysyn qanaǵattandyrady.
Eske sala ketsek, 2019 jyldyń 20 jeltoqsandaǵy ótken Ulttyq keńestiń ekinshi otyrysynda Memleket basshysy Qasym-Jomart Toqaev sheteldik jumys kúshin tartýǵa kvotany qysqartýdy tapsyrǵan bolatyn.
