Memleket basshysy qoǵamdyq komissiialar óz jumysyna kirisip ketkenin aitty.
"Adam quqyqtary jónindegi ýákil Elvira Ázimova, belgili quqyq qorǵaýshylar: Aiman Omarova, Jemis Turmaǵambetova, Abzal Quspan jáne basqa da zańgerler jinalyp, arnaiy komissiialar qurdy. Olar ár istiń zańdylyǵyn qarap jatyr. Qoǵamdyq komissiialarǵa senimsizdik kórsetýge eshqandai sebep te, haqymyz da joq. Bilik te, quqyq qorǵaý organdary da jumystaryna aralaspaidy. Men de aralaspaimyn. Árbir quqyq buzýshylyq deregi boiynsha sharalar qabyldanady. Kináli adamdar jazaǵa tartylady. Men úshin azamattarymyzdyń quqyǵy asa mańyzdy. Ásirese, qazirgi tańda muny eń mańyzdy másele dep aitýǵa bolady. Árbir is boiynsha ádil sheshim shyǵarý men úshin negizgi printsip bolyp tabylady", - dedi Toqaev.
Prezident buzaqylar týraly máselege de toqtaldy. Ol keibir adamdar jazyqsyz azamattardy esh sebepsiz qamaýǵa aldy dep oilap, jalǵan urandardy el ishinde taratatynyn aitty.
"Biraq, mynany umytpaýymyz kerek, solardyń ishinde lańkester de, qylmyskerler de bar. Qarańyzshy, myńdaǵan adam qalany qiratyp, naǵyz terroristik áreketterge bardy. Biraq, qazir bári jai ǵana beibit azamattar bolyp shyqty. Buǵan kim senedi? Jalpy, lańkesterdi, qaraqshylardy halyq qaharmandary, batyrlary dep aitýǵa bolmaidy. Bul – eshqandai shyndyqqa kelmeitin jalǵan ýáj. Eger biz aqiqatyna kóz jetkizbei, olardyń aitqanyna senetin bolsaq, elimizge taǵy bir úlken qaýip tóndiremiz. Bul qaraqshylardy Qazaqstanǵa shaqyrý degen sóz. Sondyqtan atalǵan máselede biz óte saq bolýymyz kerek. Árbir is boiynsha muqiiat tergeý júrgizýimiz qajet", - dedi ol.
Buǵan deiin Memleket basshysynyń baspasóz hatshysy Berik Ýáli 17 aqpanda Qazaqstan Prezidenti Qasym-Jomart Toqaevtyń jańa suhbaty shyǵatynyn málimdegen bolatyn.
Prezident suhbat barysynda qasiretti qańtar oqiǵasynyń sebep-saldary men aldaǵy ýaqytta júzege asyrylatyn saiasi jáne áleýmettik reformalar, Qazaqstannyń syrtqy saiasattaǵy strategiialyq seriktesterimen qarym-qatynastaryna, qabyldaǵan sheshimderine qatysty saýaldarǵa jaýap beredi.
