QR Ortalyq sailaý komissiiasynyń tóraǵasy Nurlan Ábdirov Prezident sailaýynyń naqty nátijesi qashan, qalai shyǵarylatynyn túsindirdi, dep habarlaidy QazAqparat.
Buǵan deiin QR Ortalyq sailaý komissiiasy Prezident sailaýynyń aldyn ala nátijesin jariialaǵan edi.
«Qazaqstan Respýblikasyndaǵy sailaý týraly Konstitýtsiialyq zańǵa sáikes, aýmaqtyq sailaý komissiialary daýystar sanalǵannan keiin eki kún ishinde ár óńir boiynsha hattamalardyń túpnusqalaryn jetkizýge tiis. Biylǵy 20 qarashada ótken kezekten tys prezidenttik sailaýdyń qorytyndylary Ortalyq sailaý komissiiasynyń otyrysynda bekitiledi, ony ótkizetin kún men ýaqyt qosymsha habarlanatyn bolady», - dedi Nurlan Ábdirov Ortalyq sailaý komissiiasynda ótken baspasóz máslihatynda.
Sondai-aq, Ábdirov Ortalyq sailaý komissiiasy men aýmaqtyq sailaý komissiialarynyń atyna kelip túsken resmi jáne barlyq ótinishter zańnamada belgilengen tártippen qaralatynyn aitty.
Qazirgi ýaqytta el óńirleri men shetelderdegi sailaý ýchaskelerinde daýystardy sanaý aiaqtaldy. Ázirge aýmaqtyq sailaý komissiialary daýys berý nátijeleri týraly hattamalardyń elektrondy kóshirmelerin usynǵan.
Osylaisha OSK tóraǵasynyń aitýynsha, Qasym-Jomart Toqaevqa 6 mln 456 myń 392 sailaýshy nemese olardyń 81,31%-y daýys bergen. Ekinshi orynda 460 484 nemese 5,8% daýyspen «bárine qarsymyn» baǵany tur.
Sonymen birge, Jigýli Dairabaevqa – 271 641 adam nemese 3,42 paiyz, Qaraqat Ábdenge – 206 myń 206 nemese 2,6 paiyz, Meiram Qajykenge – 200 907 nemese 2,53 paiyz, Nurlan Áýesbaevqa – 176 116 nemese 2,22 paiyz jáne Saltanat Tursynbekovaǵa – 168 731 nemese 2,12 paiyz daýys berilgen.
Aita keteiik, keshe 20 qarashada elimizde kezekten tys prezident sailaýy ótti. Barlyq óńirde 10 033 ýchaske jumys istedi. Al shet memleketterdegi Qazaqstan ókildikteri janynda 68 ýchaske qurylǵan.
Elimizdegi búkil sailaýshylardyń 69 paiyzy nemese 8 mln 282 myńnan astam adam óz tańdaýyn jasaǵan.
