QR Prezidenti Qasym-Jomart Toqaev QazVac vaktsinasyn saldyrady. Bul týraly «Habar 24» telearnasynyń «Suqbat» baǵdarlamasynda Memleket basshysynyń baspasóz hatshysy Berik Ýáli aitty, dep habarlaidy "Ult aqparat".
«Memleket basshysy qystaǵy joldaýlarynyń birinde qazaqstandyq vaktsinany saldyratynyn aityp, barlyq azamatty vaktsina alýǵa shaqyrǵan bolatyn. Jalpy saldyrý oiynda bar. Ol jaiynda der kezinde qulaǵdar bolasyzdar dep oilaimyn», - dedi ol.
Sonymen qatar Berik Ýáli óziniń de vaktsina saldyrý oiynda bar ekendigin aitty.
«Ózderińiz bilesizder, byltyr elmen birge mende aýyrdym. 20 kúndei aýrýhanada jatyp emdeldim. Onyń bes kúninde reanimatsiiada jattym. Aýyr jaǵdaidy ótkerdim. Qudaiǵa shúkir, otandyq meditsinanyń arqasynda saýyǵyp shyqtym. Taiaýda antidenemdi anyqtatqanymda 74 paiyz bar bolyp shyqty. Dárigerlerdiń paiymynsha, ol 30 paiyzdan tómendegende vaktsina saldyrýǵa bolady eken. Osy habarǵa kelerdiń aldynda Densaýlyq saqtaý ministri Aleksei Tsoimen keńeskenimde aýyryp turǵan adam 6 aidan keiin vaktsina saldyrýǵa bolatyndyǵyn aitty. Mende vaktsina saldyrsam dep otyrmyn. Otandyq vaktsina buiyrtsa sáýir aiynyń sońynda qoldanysqa engiziledi», - dedi ol.
Osy rette ol reseilik jáne qazaqstandyq vaktsinanyń qaisysyn saldyratyndyǵyn atady.
«Men otandyq vaktsinany saldyratyn shyǵarmyn. Óitkeni, otandyq meditsinany qoldaý úshin sony tańdap otyrmyn. Sonymen qatar barshańyzdy vaktsina saldyrýǵa shaqyramyn. Memleket basshysynyń ózi de birneshe ret halyqty vaktsina saldyrýǵa shaqyryp, indetten qutylýdyń jalǵyz joly vaktsina ekendigin aitty. Shyn máninde búkil álem halqy saldyryp jatqannan keiin kertartpa pikirlerge ermei, vaktsina saldyrý kerek», - dedi Berik Ýáli.
