Qyzylordada jol apatynan kóz jumǵan bes ailyq sábi karateden álem chempiony Móldir Jańbyrbaidyń jieni bolyp shyqty. Sportshy áiel men náresteni qaǵyp, oqiǵa ornynan qashyp ketken júrgizýshini taýyp, jaýapqa tartýdy talap etti, dep habarlaidy ult.kz.

Qaiǵyly oqiǵa 13 qazan kúni saǵat 17:10 shamasynda bolǵan. Mitsubishi Lancer kóligi arbadaǵy sábi men onyń anasyn qaǵyp ketken. Ekeýi de aýrýhanaǵa jetkizilgenimen, dárigerler bes ailyq ul balanyń ómirin saqtap qala almaǵan.

Sábidiń 26 jastaǵy anasynyń jaǵdaiy óte aýyr. Týystarynyń aitýynsha, ol áli esin jimaǵan. Áieldiń qabyrǵalary men jambasy synǵan, alda birneshe kúrdeli ota kútip tur.

Qyzylorda oblystyq politsiia departamenti adam ólimine ákep soqqan jol apaty jáne oqiǵa ornyn tastap ketý derekteri boiynsha qylmystyq is qozǵalǵanyn málimdedi.

“Kúdiktiniń jeke basy anyqtaldy. Onyń ornalasqan jerin anyqtap, ustaý úshin barlyq qajetti sharalar qabyldanyp jatyr. Qyzylorda qalasynyń shyǵaberisterinde baqylaý kúsheitildi”, – delingen politsiia habarlamasynda.

Móldir Jańbyrbai politsiiany synap tastady. 

Aita keteiik, Almatyda turaqqa talas kezinde kóz jumǵan er adamǵa qatysty tyń derek shyqty.

Móldir Jańbyrbai kim?

Móldir Jańbyrbai - qazaqstandyq karateshi, 2023 jylǵy álem chempiony. Ol 1997 jyly 18 mamyrda Qyzylorda qalasynda dúniege kelgen. Tokio Olimpiadasyna qatysyp, áielder arasyndaǵy 55 kelige deiingi salmaqta jetinshi oryn alǵan.

Sportshynyń eń iri jetistigi — 2023 jyly Vengriia astanasy Býdapeshtte ótken álem chempionatyndaǵy jeńisi. Móldir 50 kelige deiingi salmaq dárejesinde altyn medal ielendi. Osylaisha, ol eresekter arasynda WKF karateden álem chempiony atanǵan tuńǵysh qazaqstandyq sportshy retinde tarihqa endi. Bul jarysta Qazaqstan quramasy bir altyn, bir kúmis jáne bir qola júlde jeńip alǵan.