Memleket basshysy Qasym-Jomart Toqaev Respýblikalyq «Ana tili» basylymyna bergen suhbatynda Qazaqstan halqyn karantin rejimin qatań saqtap, tazalyqqa muqiiat bolýǵa shaqyrdy, dep habarlaidy "Ult aqparat".
«Bul indet bizdiń ǵana emes, jalpy álemdegi adamzattyń bet-beinesin, turmys-tirshiligin ózgertti. Aýyr derttiń aldynda damyǵan memleketterdiń ózderi dármensiz bolyp otyr. Oǵan bárimiz kýámiz. Ozyq dep júrgen Eýropa elderi, azýyn aiǵa bilegen AQSh, Aziia alyptary – Qytai, Japoniia, Ońtústik Koreia, taǵy basqa da elder tyǵyryqqa tirelgendei. Al qazir, «biz osy indetpen kúreste jeńilip jatyrmyz nemese Úkimet ahýaldy baqylaýdan shyǵaryp aldy» deýge bolmaidy. Ózderińizge málim, Nur-Sultan, Almaty jáne Shymkent qalalarynda juqpaly aýrýlarǵa arnalǵan úsh aýrýhana jedel salyndy. Basqa óńirlerdegi aýrýhanalar kerek-jaraqpen jabdyqtaldy. Naýqastardy emdeýge dárigerlerimizdiń biliktiligi jetedi. Qazir, aq halatty abzal jandar kúndiz-túni osy indetpen kúrestiń aldyńǵy shebinde júr. Memleket tarapynan qajetti qarajat bólindi», - deidi Prezident respýblikalyq «Ana tili» basylymyna bergen suhbatynda.
Memleket basshysy bir máseleni erekshe atap ótti.
«Biliktegiler de – ózderińiz sekildi et pen súiekten jaralǵan adamdar. Laýazymdy qyzmetkerler jumys babyna bailanysty birqatar azamattarmen kezdesýi kerek, sondyqtan el ishindegi issaparlarǵa shyǵady. Sondai jaǵdaida keseldi juqtyryp alýy múmkin. Iá, olar da aýyrady, naýqasynan emdeledi. Bilikte júrgenderdiń arasynan 15 shaqty adam osy dertke shaldyqty. Al qazirgi statistika boiynsha, virýs juqtyrǵandar sany 20 myńǵa jýyqtady. Iaǵni olardyń kópshiligi – qarapaiym halyq. Bul jerdegi másele kimniń qalai juqtyryp alǵanynda emes. Sol azamattarymyzdyń aýrýyn asqyndyryp almai, tezirek jazylyp shyǵýyna jaǵdai jasaý qajet. Aýrýǵa shaldyqqandardy sheneýnik nemese qarapaiym jurt dep bólip qaraýǵa bolmaidy», - dep aityp ótti Qasym-Jomart Toqaev.
Prezident odan bólek qazaq «Kemedeginiń jany bir» degen sózdi eske saldy.
«Biz bir elde turyp, bir aýany jutyp, bir qoǵamda ómir súrip jatqannan keiin eshkim de bul aýrýdan ózin tolyqtai qorǵai almaidy. Bir planetany meken etken soń ózge eldegi dert bizge kelmeidi dep beiqam otyra almaimyz. Pandemiia shekaraǵa qaramaidy. Saqtansaq qana ózimizdi, jaqyndarymyzdy aýrýdan aýlaqtata alamyz. Sondyqtan el azamattaryn karantin rejimin qatań saqtap, tazalyqqa muqiiat bolýǵa shaqyramyn. Bul – ótpeli qiyndyq, ýaqytsha synaq. Biz osy indetten jáne ekonomikalyq daǵdarystan keiin qalai damimyz, ne isteýimiz kerek degen máselege basa mán bergenimiz jón», - deidi Prezident.
