Foto:alash.kz
Prezident Qasym-Jomart Toqaev mekteptegi tamaqtandyrýdy qatań baqylaýǵa alýdy tapsyrdy, dep habarlaidy ULT.KZ.
Mektepterde bastaýysh synyp oqýshylary men az qamtylǵan otbasylardan shyqqan balalar memleket esebinen tegin ystyq tamaqpen qamtylady. Alaida Prezident mektep ashanalaryndaǵy tamaqtyń sapasyna basa mán bergen jón ekenin aitty.
"Jaqynda Mańǵystaý oblysynda balalar astan ýlandy. Bul oqiǵanyń qoǵamda qyzý talqylanýy oryndy. Mundai jaǵdailardyń qaitalanýyna jol bermeý kerek. Sanitarlyq-epidemiologiialyq normalardyń saqtalýyn qatań baqylaý qajet. Biraq máseleniń máni tym tereńde jatyr. Oqýshylardy sapasy kúmándi ári arzan azyq-túlikpen tamaqtandyra almaimyz. Balalardy tamaqtandyrýdyń halyqaralyq standarttaryna umtylǵanymyz durys. Ashanadaǵy taǵamdar ósip kele jatqan aǵzany barlyq qajetti dárýmenmen qamtamasyz etýi kerek. Bul óskeleń urpaqtyń densaýlyǵyna tikelei áser etedi. Quzyrly mekemeler mektep ashanalaryndaǵy azyq-túliktiń sapasyn kóterý máselesimen muqiiat ainalysýy qajet. Mektepterde durys tamaqtandyrý mádenietin qalyptastyrý úshin agroónerkásip kesheni bilim berý oryndarynyń seriktesine ainalǵany jón", - dedi Prezident.
